امریکی باکسر ٹیرنس کرافورڈ نے عامر خان کو ہرا دیا

امریکہ کے شہر نیویارک میں میڈیسن اسکوائر گارڈن میں باکسنگ کے ورلڈ ویلٹر ویٹ بیلٹ مقابلے میں امریکی باکسر ٹیرنس کرافورڈ نے پاکستان نژاد برطانوی باکسر عامر خان ٹیکنیکل بنیاد پر شکست دے دی ہے۔

یہ مقابلہ چھ راونڈز تک جاری رہا۔ مقابلے کے چھٹے راونڈ کے 47ویں منٹ میں ریفری نے ٹیرنس کرافورڈ کو ٹیکنیکل ناک آوٹ کی بنیاد پر فاتح قرار دیا۔ 

برطانوی اخبار ڈیلی ٹیلی گراف کے مطابق عامر خان کے ٹرینر اور کوچ ورگل ہنٹر نے ڈاکٹر سے مشورہ کے بعد عامر خان کو مقابلہ جاری نہ رکھنے کا مشورہ دیا۔ ابتدائی راونڈز میں دونوں باکسر ایک دوسرے پر حملے کر کے پوائنٹس حاصل کرتے رہے۔ چوتھا راونڈ مکمل ہونے پر 31سالہ ٹیرنس کرافورڈ کو 32سالہ عامر خان پر 10-9 سے برتری حاصل تھی۔مقابلے کے اختتام تک کرافورڈ کے مجموعی پوائنٹس49 اور عامر خان کے 45پوائنٹس تھے۔ رنگ میں اترنے کے بعد ٹیرنس کرافورڈ نے کئی مرتبہ عامر خان کو بے بس کیا اور شاندار داو¿ پیچ لگاتے ہوئے عامر خان کو گرادیا۔

ٹیرنس نے عامر خان کو ٹیکنیکل بنیاد پر شکست دیتے ہوئے اپنے ٹائٹل کا دفاع کیا۔ امریکی باکسر ٹیرنس کرافورڈ کی یہ مسلسل 35 ویں کامیابی ہے جبکہ پاکستان نژاد برطانوی باکسر عامر خان نے کیریئر کے 33 مقابلوں میں سے چار میں شکست کا سامنا کیا ہے اور 20 مقابلوں میں مخالف باکسر کے خلاف ناک آوٹ کی بنیادپر فتح حاصل کی ہے۔

 اس باکسنگ مقابلے کے لیے رنگ میں اترنے سے پہلے دونوں باکسرز کا وزن چیک کیا گیا۔ دونوں باکسرز کے وزن میں .2پونڈ کا معمولی فرق پایاگیا۔ امریکی باکسر ٹیرینس کرافورڈ کا وزن 146.4پونڈ تھا جبکہ باکسر عامر خان کا وزن 146.6پونڈ تھا۔