پی سی بی اور انڈین سونی ٹی وی کا پی ایس ایل سمیت تمام میچز دکھانے کا معاہدہ

پاکستان کرکٹ بورڈ (پی سی بی) نے انڈین ٹی وی سونی کے ساتھ تین برس تک پاکستان سپر لیگ (پی ایس ایل) اور پاکستان میں ہونے والے تمام انٹرنیشنل میچز دکھانے کا معاہدہ کیا ہے۔

پی سی بی کی طرف سے کی جانے والی ٹویٹ کے مطابق چیف ایگزیکٹو وسیم خان نے ایک بیان میں کہا ہے کہ ’پی سی بی سونی پکچرز نیٹ ورک انڈیا کو اپنے نمایاں براڈکاسٹرز کی فہرست میں خوش آمدید کہتا ہے۔ اس شراکت داری سے جنوب ایشیا میں کرکٹ شائقین کو پاکستان میں تمام فارمیٹ کے میچز دیکھنے کا موقع ملے گا۔‘

سونی پکچرز نیٹ ورک انڈیا کے چیف ریوینیو آفیسر راجیش کول نے کہا ہے کہ ’سونی نیٹ ورک نے پی سی بی سے تین برس تک براڈکاسٹ کے حقوق حاصل کیے ہیں۔ سونی پاکستان میں ہونے والے پی ایس ایل میچز اور ہوم گراؤنڈ پر ہونے والے انٹرنیشنل میچز دکھائے گا۔‘

انڈین نیوز ایجنسی اے این آئی کے مطابق اس سے قبل پی ٹی وی سپورٹس اور سپر سپورٹس کے پاس پاکستان اور افریقہ ریجن کے حقوق تھے۔ پی سی بی نے اس کے علاوہ شمالی امریکہ، کیریبین، نیوزی لینڈ اور برطانیہ کے ساتھ شراکت داری کے معاہدے کیے ہیں۔

شمالی امریکہ میں ’ویلو ٹی وی، کیریبین میں ’فلو سپورٹس، برطانیہ میں سکائی سپورٹس اور نیوزی لینڈ میں سکائی نیوزی لینڈ کے ذریعے میچز دکھائے جائیں گے۔