اقوام متحدہ میں پاکستان اور دنیا کے 36 دیگر ممالک نے چین کے مغربی علاقے سنکیانگ میں مسلمانوں کے حوالے سے چینی حکومت کی پالیسیوں کی حمایت کی ہے جبکہ 22 ممالک نے چین کی جانب سے مسلمانوں پر مبینہ پابندیوں اور ان کی نظر بندی کی مخالفت کی ہے۔
سنکیانگ اویغور نسل کا آبائی علاقہ ہے جہاں مسلمانوں کی اکثریت ہے اور ان کا کہنا ہے کہ انہیں چینی حکومت کی جانب سے امتیازی سلوک کا سامنا کرنا پڑتا ہے۔
عرب نیوز کے مطابق اقوام متحدہ نے گزشتہ برس کہا تھا کہ اس کے پاس اس حوالے سے ناقابل تلافی ثبوت موجود ہیں کہ سنکیانگ میں ایغور نسل کے 10 لاکھ سے زائد مسلمانوں کو ان کی مرضی اور کسی مقدمے کے بغیر حکومتی مراکز میں نظر بند کیا جا رہا ہے۔
تاہم چین نے ان الزامات کی تردید کرتے ہوئے کہا تھا کہ ’یہ ہنر سکھانے کے مراکز یا ووکیشنل ٹریننگ سینٹرز ہیں جہاں مسلمانوں کی سوچ تبدیل کرتے ہوئے شدت پسندی سے نمٹا جائے گا۔‘
چینی حکام کا ماننا ہے کہ سنکیانگ کے مسلمانوں کو ’تربیتی مراکز‘ میں رکھنا اسلامی شدت پسندی کے خاتمے کے لیے ضروری ہے۔
خیال رہے کہ روان ہفتے دنیا بھر سے مختلف ممالک کے 22 سفیروں جن میں زیادہ تعداد یورپی سفیروں کی تھی نے اقوام متحدہ کی انسانی حقوق کی کونسل کو ایک خط لکھتے ہوئے سنکیانگ میں چینی پالیسیوں کو تنقید کا نشانہ بنایا تھا۔
اس کے جواب میں پاکستان سمیت دنیا کے 37 ممالک نے انسانی حقوق کی کونسل کو خط لکھتے ہوئے انسانی حقوق کے حوالے سے چین کی پالیسیوں کی تعریف کی۔
اس خط میں لکھا گیا کہ ’انتہا پسندی اور دہشت گردی کے خطرناک چیلنج کا سامنا کرنے والے چین نے سنکیانگ میں انسداد دہشت گردی اور انتہا پسندانہ سوچ کے خاتمے کے لیے خاصا کام کیا ہے جس میں ووکیشنل تعلیم اور ٹریننگ سینٹرز کا قیام بھی شامل ہے۔‘
خط میں یہ بھی لکھا گیا ہے کہ ’سنکیانگ میں امن و امان بحال ہو گیا ہے اور یہاں تمام نسلی گروہوں سے تعلق رکھنے والے افراد کو بنیادی انسانی حقوق حاصل ہیں۔ اس علاقے میں گزشتہ تین برس سے کوئی دہشت گرد حملہ نہیں ہوا، اب یہاں لوگ اپنے آپ کو پہلے سے زیادہ خوش اور محفوظ تصور کرتے ہیں۔‘
