Sorry, you need to enable JavaScript to visit this website.

اب تک 37 لاکھ غیر قانونی تارکین گرفتار

گرفتار شدگان میں سے 9 لاکھ 18 ہزار203 غیر ملکیوں کو مملکت سے بیدخل کردیا گیا ہے
سعودی وزارت داخلہ نے اعلامیہ جاری کرتے ہوئے کہا ہے کہ ’’غیر قانونی تارکین سے پاک مہم‘‘ کے تحت اب تک 37 لاکھ سے زائد غیر قانونی تارکین گرفتار ہوئے ہیں۔
سعودی نیوز ایجنسی (واس) میں جاری ہونے والے اعلامیہ میں کہا گیا کہ گرفتار شدگان میں سعودی شہری بھی شامل ہیں جو اقامہ و لیبر قوانین کی خلاف ورزی کر نے والوں کی مدد کر رہے تھے۔
سرکاری اعداد وشمار کے مطابق گرفتار شدگان کی مجموعی تعداد37 لاکھ14 ہزار418 ہے جن میں سے 28 لاکھ 99 ہزار 318  اقامہ قوانین کی خلاف ورزی کے مرتکب تھے۔لیبر قوانین کی خلاف ورزی کرنے والے گرفتار شدگان کی تعداد 5 لاکھ 72 ہزار573 ہے جبکہ دو لاکھ 42 ہزار 527 ایسے افراد گرفتار ہوئے جو ملک کے سرحدوں کی خلاف ورزی کر رہے تھے۔

 مہم کے تحت ہر اس شخص کو گرفتار کیا جائے گا جو اقامہ یا لیبر قوانین کی خلاف ورزی کرے گا

وزارت داخلہ نے کہا ہےکہ غیر قانونی طور پر سعودی عرب میں دراندازی کرنے والے 62 ہزار825 افراد کو گرفتار کیا گیا ہے جن میں سے 46 فیصد یمنی ،51  فیصد ایتھوپین جبکہ 3 فیصد دیگر ممالک سے تعلق رکھتے ہیں۔
اسی طرح 2718 ایسے افراد بھی گرفتار ہوئے ہیں جو غیر قانونی طور پر سعودی عرب کی سرحد عبور کرکے باہر جانے کی کوشش کر رہے تھے۔
اقامہ ولیبر قوانین کی خلاف ورزی کرنے والوں کو پناہ دینے ، ان کے ساتھ تعاون کرنے یا انہیں مختلف سہولتیں فراہم کرنے کے الزام میں4139 افراد گرفتار ہوئے۔ ان میں سے سعودی شہریوں کی تعداد1543 ہے جنہیں گرفتار کیا گیا ہے۔

غیر قانونی تارکین کے ساتھ تعاون کرنے پر1543 سعودی شہری بھی گرفتار ہوئے

 گرفتار شدگان میں سے 9 لاکھ 18 ہزار203 غیر ملکیوں کو مملکت سے بیدخل کردیا گیا ہے جبکہ باقی گرفتار شدگان میں سے بعض سزا پوری کر رہے ہیں اور بعض مملکت سے بیدخل کئے جانے کی کارروائی کے منتظر ہیں۔
واضح رہے کہ سعودی عرب نے ملک میں مقیم تارکین کو مملکت میں قیام اور کام کو قانون کے دائرے میں لانے کے لئے 6 ماہ کی مہلت دی تھی جس کے ختم ہونے پر’’غیر قانونی تارکین سے پاک مہم‘‘ کا آغاز کیا گیا تھا۔
مملکت کے طول وعرض میں جاری اس مہم کے تحت ہر اس شخص کو گرفتار کیا جائے گا جو اقامہ یا لیبر قوانین کی خلاف ورزی کرے گا۔
 

 اقامہ قوانین کی خلاف ورزی کرنے والے گرفتار شدگان کی تعداد28 لاکھ سے زائد ہے

 

شیئر: