پاکستان سے گوشت کی پہلی کھیپ اردن پہنچا دی گئی: مشیر تجارت

پاکستان سے گوشت کی پہلی کھیپ نجی کمپنی کی جانب سے اردن پہنچا دی گئی ہے۔

پاکستانی وزیراعظم عمران خان کے مشیر تجارت رزاق داؤد نے پیر کو ایک ٹویٹ میں لکھا کہ ’ہم ٹاٹا فوڈ کو پاکستان سے گوشت کی پہلی کھیپ اردن ایکسپورٹ کرنے پر مبارکباد دیتے ہیں۔‘

انہوں نے لکھا کہ ’نئی منڈیوں تک غیر روایتی ایکسپورٹس کی ترویج کے لیے  وزارت تجارت کوشاں ہے۔‘

رزاق داؤد نے اپنے پیغام میں مزید لکھا کہ ’دیگر برآمد کنندگان کو بھی اپنی مصنوعات میں تنوع اور نئی مارکیٹ تک رسائی کےلیے کوشش کرنی ہوگی۔‘

اس سے قبل اکتوبر کے آخری ہفتے میں پاکستان کے تین سلاٹر ہاﺅسز (مذبحہ خانوں) کو مویشیوں کا گوشت اُردن برآمد کرنے کا اجازت نامہ ملا تھا اور اس سلسلے میں سرکاری اعلامیہ بھی جاری کیا گیا تھا۔

پاکستان کی وزارت تجارت کی جانب سے ایک بیان میں بتایا گیا تھا کہ ان مذبحہ خانوں کو مویشیوں کا گوشت برآمد کرنے کے لیے اردن نے اجازت نامے کا اعلامیہ جاری کردیا ہے۔

اس حوالے سے پاکستان کی وزارت تجارت کا کہنا تھا کہ ’ہمیں یہ اطلاع دیتے ہوئے بڑی خوشی محسوس ہورہی ہے کہ اردن نے پاکستان کے تین مذبحہ خانوں کو بکریوں، بھیڑوں اور اونٹوں کا گوشت اردن برآمد کرنے کا سرکاری اعلامیہ جاری کردیا ہے۔‘

وزیراعظم کے مشیر برائے تجارت عبدالرزاق داؤد کا کہنا تھا کہ ’میں اپنے تمام برآمد کنندگان پر زور دیتا ہوں کہ وہ گوشت کی اس غیر روایتی مارکیٹ کے ان مواقع سے بھرپور فائدہ اٹھائیں۔‘

 انہوں نے مزید کہا کہ ’برآمد کنندگان گوشت کے علاوہ آلو، آم، کینو، پیاز اور دیگر پھل اور سبزیاں بھی پاکستان سے بیرون ملک بھیجیں۔‘