شاہ سلمان مرکز کی جانب سے افغانوں کے لیے امدادی سامان
جمعرات 6 جنوری 2022 19:15
امدادی ٹرکوں کے قافلے جلال آباد اورکابل بھیجے گئے(فوٹو، ایس پی اے)
سعودی عرب کی جانب سے 19 ٹرکوں پر مشتمل ایک اور امدادی کاررواں افغانستان پہنچا گیا- شاہ سلمان مرکز برائے امداد و انسانی خدمات کی جانب سے پاکستان کے راستے افغان بھائیوں کے لیے امدادی سامان بھجوانے کا سلسلہ جاری ہے-
ارسال کیے جانے والے امدادی کاررواں 19 ٹرکوں پرمشتمل ہے جس میں کھانے پینے، رہنے سہنے اور سردی سے بچاؤ کے لیے گرم ملبوسات شامل ہیں-
سعودی خبررساں ایجنسی ’ایس پی اے‘ کے مطابق امدادی قافلے میں شامل 19 ٹرکوں میں سے 10 ٹرک کابل میں افغان ہلال احمر کے حوالے کیے گئے- ان پر آٹے کی 7 ہزار بوریاں، 3500 راشن تھیلے، 1755 گرم ملبوسات کے بیگ، 2379 کمبل لدے ہوئے تھے-
9 ٹرک جلال آباد میں ہلال احمر کے حوالے کیے گئے جن پر آٹے کی 8 ہزار بوریاں، 4 ہزار راشن تھیلے، 8 ہزار گرم ملبوسات کےبیگ اور 1600 کمبل لدے ہوئے تھے- یہ تمام سامان افغانستان کے مختلف علاقوں میں ضرورت مند اور متاثرہ خاندانوں میں تقسیم کیا جارہا ہے-
یاد رہے کہ سعودی عرب، افغان بھائیوں کے لیے بری اور فضائی راستوں سے امدادی سامان بھجوا رہا ہے- اس حوالے سے طے کیا گیا ہے کہ 200 سے زیادہ ٹرکوں کے ذریعے 30 ہزار راشن تھیلے، 10 ہزار گرم ملبوسات کے بیگ بھیجے جائیں گے- جن کا وزن 1920 ٹن ہوگا-