ہر شخص نے بنا لیا جب آشیاں الگ

ڈاکٹر حنا امبرین طارق۔ کینیڈا

میرا یقین اور ہے تیرا گماں الگ

لیکن کسی گماں سے ہے سود و زیاں الگ

یہ زندگی ملی ہے تو ہنس کر گزار دیں

ہر ایک لب پہ یوں تو ہے آہ و فغاں الگ

کیسا یہ دور آگیا کس سے کریں گلہ

کیوں سب ہیں بولتے یہاں اپنی زباں الگ

اب کیسے راہ و رسم روا رکھ سکے کوئی

ہر شخص نے بنا لیا جب آشیاں الگ

چاروں طرف سکوت ہے گھر میں حنا مگر

دیوار و در سے آگے بھی ہے اک جہاں الگ