کولکتہ - - - - - - ریزروبینک آف انڈیا نے نوٹ بندش کے بعد کرنسی کی قلت دور کرنے کیلئے سکوں کی ڈھلائی شروع کردی تھی لیکن ملک بھر میں بینک کے خزانوں میں جگہ کی قلت کی وجہ سے سکوں کی ڈھلائی بند کردی گئی ہے۔ ریزروبینک کے ذرائع کے مطابق ملک کی تمام ٹکسالوں میں سکوں کے ڈھیر لگے ہوئے ہیں کیونکہ نوٹ بندش کے دوران ایک ہزار اور 500روپے کے نوٹوں کی گڈیاں جو جمع کی گئی تھیں ان کے انبار لگے ہوئے ہیں اور خزانوں میں ان گڈیوں کی وجہ سے اتنی جگہ باقی نہیں بچی کہ ڈھالے گئے سکوں کو رکھا جاسکے حالانکہ ریزروبینک نے ٹکسالوں سے ضرورت کے مطابق وقتاً فوقتاً سکے اٹھا کر کمرشل بینکوں کو فراہم کئے ہیں لیکن اسکے باوجود ٹکسالوں اور خزانوں میں سکے بھرے ہوئے ہیں۔ سرکاری شعبہ کی کمپنی سیکیورٹی پرنٹنگ اینڈ منٹنگ کارپوریشن آف انڈیا کے پاس ممبئی کولکتہ ، حیدرآباد اور نوئیڈا میں ٹکسالیں ہیں مگر ان میں ڈھلے ہوئے سکوں کے انبار لگے ہوئے ہیں اور ٹکسالوں سے مزید سکوں کی ڈھلائی ہونے سے جگہ باقی نہیں بچی ۔ یہی وجہ ہے کہ ریزرو بینک نے سکوں کی ڈھلائی پر پابندی لگا دی ہے۔ ممبئی منٹ کی وجہ سے جو داخلی نوٹس جاری کیاگیا ہے اس کے مطابق ایس پی ایم سی آئی ایل کی ہدایات میں کہا گیا ہے کہ تمام ملازمین کو آگاہ کیا جاتا ہے کہ ممبئی میں سرکولیشن کوائنز کی ڈھلائی فوری طور سے روک دی جائے۔ سکوں کی ڈھلائی پر پابندی لگانے سے لوگوں کیلئے کوئی پریشانی نہیں ہوگی کیونکہ آر بی آئی کے پاس سکوں کی مکمل فراہمی کے پورے بندوبست ہیں او ر ان کی وافر تعداد موجود ہے۔ 24 نومبر 2016 ء کو بینک کے پاس ایک، 2، 5اور10 والے 676 کروڑ روپے مالیت کے سکے تھے اس لئے ٹکسالوں میں سکوں کی ڈھلائی بند ہونے سے کوئی فرق نہیں پڑے گا ۔
