انگلینڈ نے آسٹریلیا کو تیسرے ون ڈے میں روند دیا

ناٹنگھم: انگلینڈ نے آسٹریلیا کے خلاف 481 رنز بناکر ون ڈے کرکٹ کا نیا ریکارڈ قائم کردیا۔یہ پہلا موقع ہے جب کسی بھی ون ڈے میچ میں 450 سے زائد رنز بنے۔ میزبان ٹیم کی جانب سے ایلکس ہیلز نے 147 جبکہ جونی بیئر اسٹو نے 139 رنز کی جارحانہ اننگز کھیلی۔اس کے علاوہ جیسن روئے 82 اور کپتان اوئن مورگن 67 رنز کے ساتھ نمایاں رہے۔آسٹریلوی بولرز انگلش بلے بازوں کے ہاتھوں بالکل بے بس نظر آئے۔ بولر انڈریو ٹائی نے 9 اوورز میں 100 رنز دیے جبکہ جھائی رچرڈسن نے اپنے مقررہ 10 اوورز میں 92 رنز دیے۔اس سے قبل انگلینڈ ہی کے پاس یہ ریکارڈ تھا جو اس نے 2016 ءمیں پاکستان کے خلاف 444 رنز کی صورت میں بنایا تھا۔اس میچ میں بھی ایلکس ہیلز نے پاکستانی گیند بازوں کی جم کر پٹائی کی تھی اور 171 رنز کی شاندار اننگز کھیلنے میں کامیاب رہے تھے۔ہدف کے تعاقب میں آسٹریلیا کی پوری ٹیم 239 رنز بناکر آوٹ ہوگئی اور انگلینڈ یہ میچ 242 رنز سے جیت گیا۔یہ انگلینڈ کی ون ڈے کرکٹ کی تاریخ میں اب تک کی سب سے بڑی فتح ہے۔ اس سے قبل انگلینڈ کی سب سے بڑی فتح 210 رنز کی تھی جو اس نے 2015ءمیں نیوزی لینڈ کے خلاف حاصل کی تھی۔اس کامیابی کے ساتھ انگلینڈ کو 5ون ڈے میچوں کی سیریز میں0-3کی ناقابل شکست برتری حاصل ہوگئی ہے۔