لیگی کارکنوں کیخلاف کریک ڈاﺅن ‘ رات بھر گرفتاریاں

 لاہور: پنجاب پولیس نے سابق وزیر اعظم نواز شریف کے استقبال کی تیاریاں کرنے والے پارٹی کارکنوں کے خلاف کریک ڈاﺅن شروع کردیا۔ ذرائع کے مطابق رات گئے لاہور پولیس نے صوبائی دارالحکومت کے مختلف علاقوں میں چھاپا مار کارروائیاں کیں اور اس دوران مسلم لیگ ن کے کئی رہنماﺅں کو حراست میں لیا گیا۔ جس پر لیگی کارکنوں نے احتجاج کیا۔ پولیس کی جانب حراست میں لیے گئے لیگی کارکنوں میں فیصل ٹاﺅن تحفظ امن کمیٹی کے چیئرمین عاشرجٹ، کاہنہ سے مسلم لیگ ن کے وائس چیئرمین محمد شفقت، یو سی 98 چیئرمین مزمل گجر جبکہ چیئرمین یوسی 78 سید عامر شاہ گلشن راوی کے گھر پر بھی چھاپہ مارا گیا ہے ۔ علاوہ ازیں فیروزوالہ یوسی 2 ن لیگی چیئرمین شیخ کاشف، یوسی 4 کے ساجد چوہان اور جوہر ٹاﺅن سے مسلم لیگ ن کے چیئرمین ملک نثار احمد کھوکھر کو بھی گرفتار کرلیا گیا ہے ۔ پولیس نے یو سی 33 یکی گیٹ وائس چیئرمین احمد رشید بٹ کے دفتر اور فیروزوالہ شاہدرہ پولیس نے مسلم لیگ ن کے چیئرمینز اور نائب چیئرمینز کے گھروں پر چھاپے مارے جب کہ مزید گرفتاریوں کے لیے چھاپوں کا سلسلہ جاری ہے ۔ دوسری جانب سے ڈی آئی جی آپریشنز لاہور شہزاد اکبر کا کہنا تھا کہ کسی بھی سیاسی جماعت کو قانون ہاتھ میں نہیں لینے دیں گے ، ضابطہ اخلاق کی خلاف ورزی پر بلا امتیاز کارروائی کی جا رہی ہے جب کہ شرپسند کارکنان کی نظربندی اور ضابطہ اخلاق پر عمل کے سخت احکامات دیئے گئے ہیں۔ شہزاد اکبر کا مزید کہنا تھا کہ محکمہ داخلہ کی جانب سے شرپسند کارکنان کی نظربندی کے لیے فہرستیں تیار کی گئی ہیں ۔ ضلعی انتظامیہ کو 300 افراد کو نظربند کرنے کا حکم دیا۔