پاکستانی فٹبال ٹیم کے سابق کپتان کلیم اللہ کو شوکاز نوٹس

لاہور:پاکستان فٹبال فیڈریشن نے فٹبال ٹیم کی تاریخی فتح کے اثر کو زائل کرنے اور فیڈریشن کی ساکھ خراب کرنے پر فٹبال ٹیم کے سابق کپتان کلیم اللہ کو شوکاز نوٹس جاری کردیا ۔ انہیں فٹبال فیڈریشن کے ضابطہ اخلاق کی 2شقوں کی خلاف ورزی کا مرتکب ٹھہرایا گیا اور 29ستمبر تک شوکاز نوٹس کا جواب دینے کی ہدایت کی گئی ہے۔ نوٹس میں کہا گیا کہ ایشین گیمز میں نیپال کے خلاف فتح کو سراہنے کے بجائے آپ نے ناصرف پاکستانی ٹیم کی کارکردگی کو کمتر دکھانے کی کوشش کی بلکہ بے بنیاد بیانات کے ذریعے پاکستان فٹبال فیڈریشن کی ساکھ کو بھی خراب کرنے کی کوشش کی۔ شوکاز نوٹس میں کلیم اللہ کو ہدایت کی گئی کہ وہ بتائیں کہ فیڈریشن کے ضابطہ اخلاق کی خلاف ورزی اور میڈیا میں بے بنیاد بیانات دینے پر ان کا کیس پی ایف ایف کی اخلاقی اور ڈسپلنری کمیٹی کو کیوں نہ بھیجا جائے؟واضح رہے کہ ایشیا کپ کے لیے لگائے گئے تربیتی کیمپ میں شرکت نہ کرنے پر کلیم اللہ کو ایونٹ کے لیے منتخب کی گئی ٹیم کا حصہ نہیں بنایا گیا تھا۔انہوں نے اپنے بیان میں الزام عائد کیا تھا کہ پی ایف ایف معاملات کو پروفیشنل انداز میں نہیں چلا رہی، ہمارے پاس ایک بھی اپنا اسٹیڈیم یا ٹریننگ سینٹر نہیں جس میں ہم عالمی معیار کی ٹریننگ کرسکیں۔

کھیلوں کی مزید خبریں پڑھنے کیلئے اردونیوز " واٹس ایپ اسپورٹس گروپ" جوائن کریں