ریاض کے قبرستانوں میں ترقیاتی امور کی منظوری 

ریاض میونسپلٹی نے  عندیہ دیا ہے کہ دارالحکومت کے قبرستانوں کوجدید خطوط پر استوار کیا جائے گا- 

سبق ویب سائٹ کے مطابق ریاض میں قبرستانوں کی تعداد 95 تک پہنچ گئی ہے- ان میں سے صرف  8 زیر استعمال ہیں-  تین مستقبل میں استعمال میں لائے جائیں گے جبکہ  84 قبرستان بند کردیے گئے ہیں- 

ریاض میونسپلٹی کے ذرائع کی جانب سے مزید کہا گیا کہ قبروں  پر نمبر ڈالے  جائیں گے تاکہ لواحقین اپنے متوفی اعزہ کی قبروں کی شناخت آسانی سے کرسکیں- 

میونسپلٹی نے توجہ دلائی کہ تدفین کے لیے آنے والوں کو  سورج کی تمازت سے بچانے کے لیے قبرستانوں میں سائبان نصب کیے جائیں گے-

آئندہ لواحقین اپنے متوفی اعزہ کی قبریں آن لائن تلاش کرسکیں گے- تاریخی قبرستانوں میں اصلاح و مرمت کے کام ہوں گے اور ان کی شکل و صورت بہتر بنائی جائے گی-