اسلام آباد میں او آئی سی اجلاس، ’مقصد افغانستان کے لیے امداد‘

پاکستان کے دفتر خارجہ کے ترجمان نے کہا ہے کہ او آئی سی وزراء خارجہ اجلاس میں شرکت کے لیے تمام مندوبین اسلام آباد آئیں گے۔

اردو نیوز سے گفتگو میں ترجمان دفتر خارجہ عاصم افتخار نے بتایا کہ وزیر خارجہ شاہ محمود قریشی کی جانب سے تمام رکن ممالک کے علاوہ اقوا  متحدہ اور پی فائیو ممالک کو شرکت کی دعوت دی گئی ہے۔

ان کے مطابق متعدد ممالک کی جانب سے کانفرنس میں شرکت کی یقین دہانی کرا دی گئی ہے۔ 

ایک سوال کے جواب میں ترجمان نے بتایا کہ ’او آئی سی وزرائے خارجہ اجلاس کے لیے ورچوئل یا ہائبرڈ شرکت کا آپشن نہیں رکھا گیا۔‘

افغانستان کے معاملے پر پاکستان کی درخواست پر سعودی عرب نے او آئی سی وزرائے خارجہ کا غیر معمولی اجلاس 19 دسمبر کو اسلام آباد میں طلب کر رکھا ہے۔ 

دفتر خارجہ کے ترجمان عاصم افتخار نے بتایا کہ ’کانفرنس کا بینادی مقصد افغانستان میں انسانی المیے کا جائزہ لینے، افغان عوام کی مدد کرنے اور افغانستان کے لیے کسی بھی قسم کی امداد حاصل کرنا ہے۔

امید ہے کہ یہ اجلاس افغان عوام کی مدد کرنے کے لیے ٹھوس اقدامات کا باعث بنے گا۔ اس حوالے سے رکن ممالک اور عالمی اداروں کی جانب سے امداد کی فراہمی کی یقین دہانی سب سے اہم مقصد ہے۔‘ 

انہوں نے کہا کہ ’پاکستان پوری کوشش کر رہا ہے کہ اس اجلاس کو بامقصد اور کامیاب بنایا جائے۔ اسی وجہ سے رکن ممالک کے ساتھ ساتھ اقوام متحدہ، اہم مالیاتی عالمی اداروں اور پی فائیو ممالک کو بھی مدعو کیا ہے۔ جس طرح او آئی سی کردار ادا کر رہا ہے کسی اور ادارے نے کام نہیں کیا۔ اب بھی امید ہے کہ او آئی سی ہی افغانستان کو کسی بھی معاشی تباہی سے محفوظ بنانے کردار ادا کرے گی۔‘ 

ایک سوال کے جواب میں انہوں نے واضح کیا کہ ’افغان طالبان کی حکومت کو تسلیم کرنے کا معاملہ کانفرنس کا مرکزی نکتہ نہیں ہے، بلکہ ہماری ترجیح افغانستان کے لیے امداد کا حصول ہے۔ تاہم رکن ممالک کو افغان حکومت کو تسلیم کرنے کے بارے میں بات کرنے کا موقع ضرور میسر آ سکتا ہے۔‘

دوسری جانب پاکستان کے دارالحکومت اسلام آباد میں کانفرنس کی تیاریاں عروج پر پہنچ چکی ہیں۔ کانفرنس کے انعقاد کے لیے پارلیمنٹ ہاؤس کا انتخاب کیا گیا ہے۔ جس وجہ سے پارلیمنٹ کو 13 سے 20 دسمبر تک قومی اسمبلی اور سینیٹ سیکرٹریٹ بند کر دیے گئے ہیں۔ اسی وجہ سے سوموار کو بلایا گیا قومی اسمبلی کا اجلاس بھی منسوخ کرتے ہوئے 22 دسمبر کو بلایا گیا ہے۔ 

اسلام آباد کی شاہراہوں پر تزئین و آرائش کا کام بھی جاری ہے، جبکہ ایئرپورٹ سے ریڈ زون آنے والے تمام راستوں کی سیکیورٹی کلیئرنس کا کام بھی جاری ہے۔