کیا کیپٹنز ڈے کی تقریب کے دوران جنوبی افریقی کپتان ٹیمبا باوُوما سو گئے تھے؟

آئی سی سی کرکٹ ورلڈ کپ کے شروع ہونے میں صرف ایک دن باقی ہے۔

اسی سلسلے میں انڈیا کے شہر احمدآباد میں بدھ کو کیپٹنز ڈے کے عنوان سے ایک تقریب کا اہتمام کیا گیا جس میں ورلڈ کپ میں شریک تمام ٹیموں کے کپتانوں نے شرکت کی اور سوالات کے جوابات دیے۔

کیپٹنز ڈے کی تقریب میں شریک تمام ٹیموں کے کپتانوں نے جہاں کئی سوالوں کے جوابات دیے وہیں پاکستانی ٹیم کے کپتان بابر اعظم اور انڈین ٹیم کے کپتان روہت شرما بھی نہایت خوشگوار موڈ میں نظر آئے تاہم اس تقریب کی سب سے دلچسپ بات ایک میم کی صورت میں وائرل ہے۔

وہ میم جنوبی افریقہ کے کپتان ٹیمبا باوُوما کے حوالے سے ہے جن کے بارے میں یہ گمان کیا جا رہا ہے کہ وہ اس تقریب کے دوران سو گئے تھے۔

سماجی رابطوں کی ویب سائٹ ٹوئٹر پر ٹیمبا باوُوما کی تصویر کو شیئر کیا جا رہا ہے جس میں وہ کرسی پر بیٹھے آںکھیں بند کیے ہوئے ہیں اور انہیں دیکھ کر ایسا لگ رہا ہے جیسے وہ سو رہے ہوں۔

جنوبی افریقی کپتان کی تصویر جب میم کے طور پر شیئر ہونے لگی تو اس کے بعد اُن کی جانب سے وضاحتی جواب بھی سامنے آگیا ہے۔

ٹیمبا باوُوما نے اپنی ٹویٹ میں وضاحت کرتے ہوئے لکھا کہ ’میں اس میں کیمرے کے رُخ (اینگل) کو موردِ الزام ٹہراؤں گا، میں سو نہیں رہا تھا۔‘
 

دوسری جانب ٹیمبا باوُوما کے اس انداز پر صارفین میمز کی صورت میں خوب لطف اندوز ہو رہے ہیں۔

انُوپ نے باوُوما کی تصویر شیئر کرتے ہوئے لکھا کہ ’سو جاتا ہوں، جب سب کو انڈیا پاکستان سے ہی سوال کرنا ہے تو۔‘
 

رتنیش لکھتے ہیں کہ ’ٹیمبا باوُوما بھائی پہلے سے ہی کیپٹنز ایونٹ سے اُکتا گئے ہیں۔ وہ سو رہے ہیں۔‘
 

سمیر الانا نے مزاحیہ انداز میں میم بناتے ہوئے لکھا کہ ’اُٹھ جا بھائی، ٹٰیچر تجھے دیکھ رہی ہے۔‘
 

یش جین نے اپنی ٹویٹ میں تبصرہ کیا کہ ’ٹیمبا باوُوما سو نہیں رہے، وہ بس نیچے دیکھ رہے ہیں۔ یہ ویڈیو دیکھیں۔  بغیر کسی وجہ سے اُن کا مذاق نہ اڑائیں۔‘
 

خیال رہے جنوبی افریقہ ورلڈ کپ میں اپنے سفر کا آغاز 7 اکتوبر کو سری لنکا کے خلاف نئی دہلی میں میچ سے کرے گا۔