’قدرت کا نظام پاکستان کے لیے کام کرنے لگا،‘ سیمی فائنل میں پہنچنے کی امیدیں بدستور برقرار

آئی سی سی کرکٹ ورلڈ کپ کے اہم ترین میچ میں پاکستان نے نیوزی لینڈ کو شکست دے دی ہے۔

سنیچر کو بنگلور کے چناسوامی سٹیڈیم میں کھیلے گئے میچ میں پاکستان کو جیت کے لیے 402 رنز کا ہدف ملا جس کے جواب میں پاکستان نے ڈک ورتھ لوئس میتھڈ کے تحت نیوزی لیںڈ کو 21 رنز سے ہرا دیا۔

پاکستان کی جانب سے اس انتہائی اہم میچ میں اوپنر فخر زمان نے جارحانہ اننگز کھیلتے ہوئے 11 چھکوں اور 8 چوکوں کی مدد سے 126 رنز بنائے اور آؤٹ نہیں ہوئے۔

کپتان بابر اعظم نے بھی فخر زمان کا خوب ساتھ دیتے ہوئے 6 چوکے اور 2 چھکے لگا کر 66 رنز کی اننگز کھیلی۔

سیمی فائنل میں رسائی حاصل کرنے کے لیے پاکستان کو یہ میچ ہر صورت جیتنا تھا جس میں گرین شرٹس کامیاب رہے۔

نیوزی لینڈ کے خلاف جیت کے بعد گرین شرٹس کے سیمی فائنل میں جانے کا راستہ بدستور کھلا ہے اور پاکستانی ٹیم 8 پوائنٹس کے ساتھ پوائنٹس ٹیبل پر پانچویں نمبر پر آگئی ہے۔

اس جیت پر کرکٹ کے مداح سوشل میڈیا پر پاکستان ٹیم کے 12 ویں کھلاڑی ’قدرت کے نظام‘ کے بھی خوب شکر گزار ہیں۔

مُفدل وہرہ نے اپنی ٹویٹ میں لکھا کہ ’قدرت کا نظام پاکستان کے لیے کام کرنے لگا۔‘
 

سعد نے ٹیم کی جیت کے بعد تبصرہ کرتے ہوئے لکھا کہ ’جس رب نے 402 کے بعد بھی ہمیں جتوایا ہے وہ رب سری لنکا کو بھی جتوائے گا نیوزی لینڈ کے خلاف اور ہم بھی انگلینڈ کو ہرائیں گے۔ قدرت کا نظام اور پاکستان کرکٹ۔‘
 

ٹوئٹر ہینڈل نامعلوم افراد نے اپنی ٹویٹ میں لکھا کہ ’چار گھنٹے پہلے مجھے کوئی کوئی لاکھ بار کہتا کہ پاکستان جیت جائے گا تو میں اس بات پر یقین نہ کرتا۔ فخر زمان نے کیا شاندار میچ چھینا ہے۔ سکواڈ میں واحد کھلاڑی ہیں جو یہ کرنے کے قابل تھے۔‘
 

مرزا لال بیگ نے معروف ٹی وی شو ’دی پویلین‘ میں شعیب ملک اور وقار یونس کے ڈانس کی ویڈیو شیئر کر دی۔
 

اریبہ نے اپنی ٹویٹ میں لکھا کہ ’400 کا ہدف 400 بنائے بغیر میچ جیت گئے۔ قدرت کا نظام الٹرا پرو میکس۔‘
 

ٹوئٹر ہینڈل چینج آف پیس نے ٹویٹ کر کے لکھا کہ ’پتا نہیں کیسے، کہاں، سب مشکلات کے خلاف، ایک قوم بابر کے سائے تلے ابھی بھی ورلڈ کپ میں زندہ ہے۔‘

فخر زمان کو 81 گیندوں پر 126 رنز کی اننگز کھیلنے پر مین آف دا میچ کا ایوارڈ دیا گیا۔