’امپائر لفٹ میں نہیں پھنسے، آسٹریلیا نے میچ جیتنے کے لیے انہیں اغوا کیا‘

میلبرن ٹیسٹ کے تیسرے دن لنچ بریک کے بعد کھیل تاخیر سے شروع ہوا کیوںکہ تھرڈ امپائر رچرڈ ایلنگ ورتھ میلبرن کرکٹ گراؤنڈ کی لفٹ میں پھنس گئے۔

جمعرات کو لنچ کے وقفے کے بعد جیسے ہی کھلاڑی دوسرے سیشن کے آغاز کے لیے میدان میں واپس آئے، آن فیلڈ امپائرز جوئل ولسن اور مائیکل گف کو بتایا گیا کہ ایلنگ ورتھ اپنے ویونگ باکس میں واپس نہیں آئے ہیں۔ ڈائننگ ایریا سے واپس جاتے ہوئے رچرڈ ایلنگ ورتھ  اور ٹی وی چینل سیون کا ایک میزبان لفٹ میں پھنس گئے تھے۔

فاکس سپورٹس کے مطابق میچ میں تاخیر کی وجہ پتا چلنے پر کریز پر موجود آسٹریلوی اوپنر ڈیوڈ وارنر ہنس پڑے۔ چند منٹوں کے بعد چوتھے امپائر، فلپ گلیسپی باؤنڈری سے تھرڈ امپائر کے باکس میں بھاگے تاکہ کھیل دوبارہ شروع ہو سکے۔

جب ریزرو امپائر فلپ گلیسپی تھرڈ امپائر کے طور پر باکس کی طرف بڑھے تو کریز پر موجود آسٹریلوی کھلاڑی سٹیو سمتھ کو آن فیلڈ امپائر جوئل ولسن سے پوچھتے ہوئے سنا گیا کہ کیا وہ ایلنگ ورتھ کے واپس آنے تک بیٹھ سکتے ہیں۔

تاہم چھ منٹ انتظار کرنے کے بعد ایلنگ ورتھ لفٹ سے باہر آنے میں کامیاب ہوئے اور کھیل دوبارہ شروع ہونے سے پہلے اپنے ساتھی امپائروں کو ہاتھ سے اشارہ کیا۔

کرکٹ آسٹریلیا اور ایم سی جی دونوں نے اس واقعہ پر ردعمل کا اظہار کیا ہے۔ کرکٹ آسٹریلیا نے سماجی رابطے کی ویب سائٹ ایکس (سابق ٹوئٹر) پر پوسٹ کیا، ’میچ تاخیر کا شکار ہوگیا ہے کیونکہ تھرڈ امپائر لفٹ میں پھنس گئے ہیں۔‘ اس پر میلبرن کرکٹ گراؤنڈ نے ٹوئٹ کے جواب میں لکھا کہ ’معذرت۔‘

اس واقعے نے نہ صرف گراؤنڈ میں موجود کرکٹ شائقین بلکہ سوشل میڈیا صارفین کی توجہ بھی حاصل کی۔ فِن نامی اکاؤنٹ نے اپنی ٹوئٹ میں لکھا ’ڈیوڈ وارنر نے امپائر کو ٹائم آؤٹ کر دیا ہے‘

بنود نامی اکاؤنٹ نے اپنی پوسٹ میں کہا ’نہیں امپائر لفٹ میں نہیں پھنسے، انہیں اغوا کر لیا گیا ہے۔ اس ہی طرح آسٹریلیا یہ میچ جیت سکتا ہے۔‘

گیرتھ ولیمز نے اپنی ٹوئٹ میں کہا ’لفٹ میں موجود تھرڈ امپائر فون پر میچ دیکھ سکتے ہیں، اگر کوئی فیصلہ دینا ہوا تو ٹیکسٹ کر دیں گے۔‘