وقت اور حالات

عموماً دیکھا یہی گیا ہے کہ اس طرح کے اقدامات کے بعداگر اچھے اور بروقت فیصلے نہ کئے جائیں تو جذبہ میں سردمہری آجاتی ہے

زبیر پٹیل ۔ جدہ

آئی ایم ایف کی سخت شرائط پاکستان نے منظور نہ کرکے وقت اور حالات کے مطابق اچھا اقدام کیا ہے۔ آئی ایم ایف نے معاشی طور پر کمزور ممالک پر اپنا آرا چلانا شروع کردیا جبکہ طاقتور معیشت کے مالک ممالک کے سامنے وہ بھیگی بلی بن جاتی ہے۔ اس وقت پاکستانی معیشت کا پہیہ گردش میں ہےاگر معیشت کی بہتری کے اقدامات اور بجلی و پانی کے انتظامات درست کرلئے گئے تو پاکستانی معیشت چند دنوں میں اپنے پیروں پر کھڑی ہوجائیگی ماضی میں اسے اپنے پیروں پر کھڑا ہونے ہی نہیں دیا گیاجس کا نتیجہ یہ نکلا کہ پڑوس کے کمزور ممالک بھی ہمیں آنکھیں دکھانے لگے تھے۔ یہ پاکستان کا بہادرانہ اقدام ہے کہ وہ اس جانب نہیں دیکھ رہا۔

بہادری کا مظاہرہ تو گزشتہ دنوں چینی قونصلیٹ پر دہشتگردانہ حملے میں خاتون پولیس افسر نے کیا جوقابل ستائش ہے مگر گورنر ، وزیراعلیٰ سندھ اور دیگر اعلیٰ حکام نے معاملہ صرف شاباش دینے تک ہی رکھا ۔ انہیں چاہئے تھا کہ اس طرح کے اقدامات پر انعام و اکرام سے نوازتے تو آئندہ دیگر افسران اور جوا ن اس جانب قدم بڑھاتے۔ عموماً دیکھا یہی گیا ہے کہ اس طرح کے اقدامات کے بعداگر اچھے اور بروقت فیصلے نہ کئے جائیں تو جذبہ میں سردمہری آجاتی ہے۔ بہرحال بعد میں اعلیٰ حکام نے ”ہوش“ میں آنے پر میڈلز اور انعامات کا اعلان کیا مگر تب تک دیر ہوچکی تھی۔ ہمارے یہاں ہر کام شاید دیر سے کرنے کی عادت ہوچکی ہے جس کا فائدہ دوسرے اٹھا لیتے ہیں اور نتیجہ یہ نکلتا ہے کہ ہمیں اس کے نقصانات ہی ملتے ہیں ۔ اگر وقت پر کام کرلیا جائے اور ہوم ورک پکا رکھا جا©ئے تو ہماری اسٹراٹیجی کسی بھی یورپی ملک سے کم نہیں۔

٭٭٭٭٭٭٭٭