وفاقی کابینہ میں وزرا کے قلمدان تبدیل، شیخ رشید اب وزیر داخلہ

پاکستان میں تحریک انصاف کی وفاقی حکومت نے کابینہ میں تبدیلیاں کی ہیں اور کئی وزرا کی وزارتیں آپس میں تبدیل کی گئی ہیں۔

وزیراعظم کے دفتر سے جاری کیے گئے بیان کے مطابق شیخ رشید کو وزارت داخلہ کا قلمدان سونپا گیا ہے جبکہ ریلوے کی وزارت اعظم سواتی کو دی گئی ہے۔

خیال رہے کہ شیخ رشید احمد طویل عرصے تک ریلوے کے وزیر رہے ہیں۔

شیخ رشید احمد: ’مرشد پاک‘ یا ’پنڈی بوائے‘؟:مزید پڑھنے کے لیے یہاں کلک کریں

وہ سنہ 2002 میں بننے والی وزیراعظم ظفراللہ جمالی کی کابینہ میں وفاقی وزیر برائے اطلاعات تھے جس کے بعد ان کو ریلوے کی وزارت دی گئی۔

وفاقی وزیر اعجاز شاہ اب انسداد منشیات کی وزارت کو دیکھیں گے۔

جمعے کو مشیر خزانہ عبدالحفیظ شیخ نے بطور وفاقی وزیر حلف اٹھایا۔ ایوان صدر میں منعقد تقریب کے دوران صدر مملکت عارف علوی نے ان سے حلف لیا۔

عبدالحفیظ شیخ کو وزیر کا حلف اٹھانے کے بعد اب پارلیمنٹ کا ممبر بننا ہوگا۔ یاد رہے کہ وہ پیپلز پارٹی کے دور حکومت میں سینیٹر بننے کے بعد وزیر خزانہ رہ چکے ہیں۔

شیخ رشید کی 15 ویں وزارت

شیخ رشید احمد پہلی دفعہ 1991 میں نواز شریف کابینہ میں وزیر صنعت بنے۔ اس دور میں وزارت ثقافت بھی ان کے پاس رہی۔

نواز شریف کے دوسرے دور حکومت میں شیخ رشید احمد کو کھیل، ثقافت، سیاحت، امور نوجوانان  اور محنت و افرادی قوت اور سمندر پار پاکستانیوں کے قلمدان سونپے گئے۔

شیخ رشید مشرف کے دور میں وزیر اعظم جمالی کے وزیر اطلاعات رہے۔ وہ شوکت عزیز کابینہ میں بھی وزیر ریلوے اور وزیر اطلاعات رہے۔

وزیراعظم عمران خان نے بھی  شیخ رشید کو 2018 میں وزیر ریلوے بنایا۔ آج جمعے کو ان کو وفاقی وزیر داخلہ بنا دیا گیا۔ یہ شیخ رشید احمد کی پندرہویں وزارت ہے۔