’کبھی نہ ختم ہونے والی فائٹ اور یادیں دینے کے لیے شکریہ میرے لڑکو‘

آسٹریلیا میں کھیلے گئے آئی سی سی ٹی20 ورلڈ کپ کے فائنل میچ میں انگلینڈ نے پاکستان کو پانچ وکٹوں سے شکست دے دی۔

اتوار کو میلبرن میں کھیلے گئے فائنل میں پاکستان کی جانب سے انگلینڈ کو 138 رنز کا ہدف دیا گیا تھا، جسے انگلینڈ نے چھ گیندیں قبل ہی حاصل کر لیا۔

مجموعی طور پر ٹی20 ورلڈ کپ میں پاکستانی ٹیم کی کارکردگی عمدہ رہی ہے۔

سپر 12 مرحلے میں انڈیا اور زمبابوے کے ہاتھوں شکست کے بعد پاکستان نے ایونٹ میں شاندار کارکردگی دکھاتے ہوئے فائنل تک رسائی حاصل کی۔

پاکستان نے سپر 12 میں جنوبی افریقہ کے خلاف اہم میچ عمدگی سے جیتا جبکہ سیمی فائنل میں نیوزی لینڈ سے آسانی سے جیت حاصل کی۔

فائنل میں شکست کے باوجود مداح اپنی ٹیم کو خراج تحسین پیش کر رہے ہیں۔

سیاست، شوبز، اور کھیلوں سے تعلق رکھنے والے افراد کی جانب سے بھی ٹیم کی حوصلہ افزائی کی جا رہی ہے۔

پاکستان کے صدر ڈاکٹر عارف علوی نے اپنی ٹویٹ میں کہا کہ ’عمدہ آل راؤنڈ کارکردگی کا مظاہرہ کرتے ہوئے کپ جیتنے پر انگلینڈ کو مبارک باد۔ پاکستانی ٹیم آپ نے اچھا کھیلا، کم سکور کے باوجود اچھی بولنگ کی اور اپنی پوری کوشش کی۔‘

وزیراعظم شہباز شریف نے گرین شرٹس کو سراہتے ہوئے کہا کہ ’پاکستانی ٹیم نے زبردست اور بہادری سے میچ میں واپسی کی، بولنگ پرفامنس شاندار تھی، لیکن انگلینڈ آج بہت اچھا کھیلا، ہمیں اپنے لڑکوں کے فائنل میں پہنچے پر فخر ہے۔‘

پاکستان کے وزیر توانائی خرم دستگیر کہتے ہیں کہ ’پاکستان ٹیم نے قوم کا پرچم اونچا کیا، بھرپور ولولے کا مظاہرہ کیا، سخت مقابلہ کیا پورے ٹورنامنٹ میں اچھی فیلڈنگ اور بولنگ کی۔‘

گلوکار عاصم اظہر کا کہنا تھا کہ ’کبھی نہ ختم ہونے والی فائٹ اور یادیں دینے کے لیے شکریہ میرے لڑکو، آپ نے ہمیں کبھی نہ ہار ماننے کا یقین دیا، آسٹریلیا میں ورلڈ کپ فائنل کھیلنا کوئی مذاق نہیں ہے، ہمیں غلطیوں سے سیکھ کر مضبوطی سے واپس آنا چاہیے۔‘

یوٹیوبر اور ایکٹر ارسلان نصیر نے ٹویٹ کی کہ ’کوئی مسئلہ نہیں ہے لڑکو، ہم اصلی چیمپیئنز کی طرح کھیلے، انگلینڈ کو مبارک ہو۔‘

پاکستانی ریسلر انعام بٹ کا کہنا تھا کہ ’پاکستان ٹیم پر تنقید کرنے سے پہلے یہ دیکھ لیں کے آپ نے پاکستان کو کیا دیا ہے، شکریہ پاکستانی ٹیم۔‘