کلکتہ نائٹ رائیڈرز کے ’مسٹری سپنر‘ سویش شرما کون؟

انڈٰین پریمیئر لیگ (آئی پی ایل) کی فرنچائز کلکتہ نائٹ رائیڈر (کے کے آر) میں اس مرتبہ نوجوان لیگ سپنر سویش شرما  ایکشن میں دکھائی دے رہے ہیں۔

اتوار کے روز دفاعی چیمپئنز گجرات ٹائٹنز کے خلاف سویش شرما نے اپنے آئی پی ایل کیریئر کا دوسرا میچ کھیلا جس میں انہوں نے چار اوورز میں 35 رنز دیتے ہوئے ایک وکٹ حاصل کی۔

اس سے قبل 6 اپریل کو لیگ کے نویں میچ میں کلکتہ نائٹ رائیڈرز (کے کے آر)  نے رائلر چیلنچرز بنگلور (آر سی بی) کے خلاف بڑے مارجن سے کامیابی حاصل کی تھی۔

205 رنز کے ہدف کے دفاع میں کلکتہ کے سپنرز نے عمدہ کارکردگی کا مظاہر کیا جس میں سٹار سپنر سنیل نارائن نے دو، ورن چکراورتھی نے تین کھلاڑیوں کو آؤٹ کیا۔

اسی میچ میں ایک گمنام نوجوان لیگ سپنر بھی کھیلتے نظر آئے جنہوں نے اپنے ڈیبیو پر تین کھلاڑیوں کو آؤٹ کر کے ٹیم کی جیت میں اہم حصہ ڈالا۔

سویش شرما کون ہیں؟

آر سی بی کے خلاف اپنے ڈیبیو پر ہی تین وکٹیں حاصل کرنے والے 19 سالہ سویش شرما کا تعلق انڈیا کے دارالحکومت نئی دہلی ہے۔

حیران کن طور پر اس میچ سے پہلے انہوں نے کوئی بھی ڈومیسٹک میچ یعنی فرسٹ کلاس یا لسٹ اے میچ نہیں کھیلا تھا۔

دائیں ہاتھ کے لیگ سپنر کو گزشتہ سال کلکتہ نائٹ رائڈرز نے مِنی آکشن میں 20 لاکھ انڈین روپے کے خریدا تھا۔

آر سی بی کے خلاف سویش شرما کا ڈیبیو بھی حیران کن رہا ہے۔

وہ میچ سے پہلے پلیئنگ الیون کا حصہ نہیں تھے تاہم انہیں امپیکٹ پلیئر کے طور پر ٹیم میں رکھا گیا تھا اور پھر دوسری اننگز میں اُنہیں بیٹر وینکاٹیش آئیر کے بدلے میں بطور امپیکٹ پلیئر ٹیم میں کھلایا گیا۔

لیگ سپنر نے پروفیشنل کرکٹ میں اپنے پہلے ہی میچ میں چار اوورز میں 30 رنز کے عوض تین وکٹیں حاصل کیں۔

ان کے بارے میں کے کے آ رکے کوچ چندراکانت پنڈت نے میچ کے بعد کہا تھا کہ ’ہم نے انہیں ٹرائل میں دیکھا تھا۔ ان کی گیند کی ہوا میں رفتار بہت تیز ہے جسے کھیلنا بہت مشکل ہے۔ وہ ابھی اتنے تجربہ کار نہیں ہیں لیکن انہوں نے لڑنے والے جذبہ دکھایا ہے۔‘

کے کے آر کے کپتان نتیش رانا نے کہا تھا کہ ’اپنا پہلا میچ کھیلنے والے سویاش نے شاندار بولنگ کی۔ یہاں تک کہ ابھی تک ہمیں بھی ان کا ٹھیک طرح سے نہیں پتا۔ وہ اپنے آپ کو حوصلہ دیتے ہیں۔ ہمارا آغاز سے ہی یہ ارادہ تھا کہ اگر ہمیں سپنر کی ضرورت پڑے تو ہم تو ہم سویاش کو ہی شامل کریں گے۔‘