ورلڈ کپ کوالیفائر: سکندر رضا کی زمبابوے کی جانب سے تیز ترین سینچری

زمبابوے میں جاری آئی سی سی کرکٹ ورلڈ کپ کوالیفائر ٹورنامنٹ میں زمبابوے نے نیدرلینڈز کو چھ وکٹوں سے شکست دے دی۔

منگل کے روز ہرارے میں کھیلے گئے میچ میں زمبابوے نے نیدرلینڈز کی جانب سے دیے گئے 316 کے ہدف کو چار وکٹوں کے نقصان پر 40 ویں اوور کی پانچویں گیند پر ہی حاصل کر لیا۔

زمبابوے کی طرف سے بیٹںگ کرتے ہوئے سکندر رضا نے 54 گیندوں پر آٹھ چھکوں اور چھ چوکوں کی مدد سے 102 رنز بنائے جبکہ شان ولیمز نے 91 اور کپتان کریگ ایروِین نے 50 رنز سکور کیے۔

سکندر رضا کی یہ اننگز کسی بھی زمبابوین کی جانب سے ون ڈے کرکٹ میں تیز ترین سینچری تھی۔

ڈچ ٹیم کی جانب سے بولنگ کرتے ہوئے شاریز احمد نے دو جب کہ وِکرم جیت سنگھ اور باس ڈی لیڈے نے ایک ایک وکٹ حاصل کی۔

اس سے قبل نیدرلینڈز نے مقررہ اوورز میں چھ وکٹوں کے نقصان پر 315 رنز بنائے۔

ڈچ ٹیم کی جانب سے وِکرم جیت سنگھ نے 88، کپتان سکاٹ ایڈورڈز نے 83 اور میکس او ڈاؤڈ نے 59 رنز بنائے۔

زمبابوے کی طرف سے بولنگ کرتے ہوئے سکندر رضا نے چار جبکہ رچرڈ این گاروا نے دو کھلاڑیوں کو آؤٹ کیا۔

میچ میں 54 گیندوں پر سینچری بنانے اور چار وکٹیں حاصل کرنے پر سکندر رضا کو پلیئر آف دی میچ کے ایوارڈ سے نوازا گیا ہے۔

نیدرلینڈز کے خلاف اہم میچ میں تاریخی کارکردگی پر سکندر رضا کے لیے سماجی رابطوں کی ویب سائٹ ٹوئٹر پر بھی تعریفی تبصرے دیکھنے میں آ رہے ہیں۔

جونز کہتے ہیں کہ ’ون ڈے کرکٹ کی تاریخ کی ایک عظیم آل راؤنڈ پرفارمنس۔ جب کمنٹیٹر نے اُن سے مسکرانے کا کہا تھا انہوں نے کہا کہ ابھی کام مکمل نہیں ہوا۔‘

سابق ویسٹ انڈین کرکٹر اور کمنٹیٹر این بشپ نے اپنی ٹویٹ میں لکھا کہ ’سکندر رضا فینز کے لیے اپنے کھیل کو مختلف لیولز پر لے کر جا رہے ہیں۔ شاندار بندہ ہے۔‘

نعمان چودھری تبصرہ کرتے ہوئے کہتے ہیں کہ ’سکندر رضا زمبابوے کرکٹ کے خدوخال تبدیل کر رہے ہیں۔ 54 گیندوں پر سینچری، 55 رنز دے کر 4 کھلاڑیوں کو آؤٹ کیا۔ زمبابوے نے اب دو میں سے دو میچ جیت لیے ہیں۔‘