مصر: ٹرک کی ٹکر سے آہنی پل گر گیا، شاہراہ کئی گھنٹے بند

مصری دارالحکومت قاہرہ کی جنوبی کمشنری الجیزہ میں ٹرک کے ٹکرانے سے پیدل چلنے والا پل گر گیا۔ حادثے میں کسی قسم  کا جانی نقصان نہیں ہوا تاہم کئی گھنٹوں تک شاہراہ پر ٹریفک بند ہوگیا۔ 

مزمز نیوز کے مطابق الجیزہ کمشنری کی شاہراہ احمد عرابی پر پیدل روڈ کراس کرنے والے پل سے ایک ٹرک ٹکرا گیا جس سے پل کا آدھا حصہ ٹرک پر گرا جبکہ باقی حصے سے روڈ کو مکمل طور پر بلاک کردیا۔ 

اپنی نوعیت کے منفرد حادثے میں کسی قسم کا جانی نقصان نہیں ہوا تاہم لوگوں کو پل کے گرنے سے کئی گھنٹے تک پریشانی کا سامنا کرنا پڑا۔  

پل گرنے کی اطلاع ملتے ہی ٹریفک حکام جائے وقوعہ پرپہنچ گئے جنہوں نے ڈرائیورجو حادثے کے بعد فرار ہوگیا تھا کو تلاش کرنے کےلیے مقامی پولیس کو طلب کیا۔ 

ڈرائیور کو گرفتار کرکے اس کا طبی معائنہ کرانے کےلیے خون کے نمونے لیے گئے تاکہ یہ معلوم کیا جاسکے کہ وہ نشے میں تو نہیں تھا۔ 

دریں اثنا ٹریفک پولیس ڈائریکٹر کرنل احمد راشد نے روڈ اتھارٹی کو ہدایت کی ہے کہ وہ تمام پلوں کی انتہائی بلندی کے لیے وضاحتی بورڈز کا انتظام کریں تاکہ بڑی گاڑیوں کے ڈرائیوروں کو اس بارے میں مغالطہ نہ ہو۔ 

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں