غزہ کو امداد کی فراہمی، امریکی وزیر خارجہ انٹونی بلنکن اردن روانہ

امریکی وزیر خارجہ انٹونی بلنکن منگل کو اُردن کے لیے روانہ ہو گئے ہیں جہاں وہ غزہ میں امداد کی ترسیل کو بڑھانے کے طریقہ کار پر تبادلہ خیال کریں گے اور حالیہ ایران اسرائیل جھڑپوں کے دوران مدد کے لیے شکریہ ادا کریں گے۔

فرانسیسی خبر رساں ایجنسی اے ایف پی کے مطابق انٹونی بلنکن ریاض میں خلیجی عرب رہنماؤں کے ساتھ بات چیت کے بعد عمان کے لیے روانہ ہوئے۔
امریکی وزیر خارجہ اردن کے شاہ عبد اللہ دوم اور وزیر خارجہ ایمن صفادی کے ساتھ ساتھ غزہ کے لیے اقوام متحدہ کی انسانی امداد اور تعمیر نو کے رابطہ کار سگریڈ کاگ سے ملاقات کریں گے۔

انٹونی بلنکن بعد میں اسرائیل کے لیے روانہ ہوں گے جہاں وہ تازہ ترین مذاکرات پر تبادلہ خیال کریں گے جس کا مقصد عارضی جنگ بندی اور یرغمالیوں کی رہائی ہے۔

بائیڈن انتظامیہ نے عالمی سطح پر تنقید اور امریکی یونیورسٹی کیمپس میں مظاہروں کے باوجود حماس کے خلاف اسرائیلی کارروائیوں کی حمایت کی ہے اور اپنے اتحادیوں پر زور دیا ہے کہ وہ شہریوں کے تحفظ کے لیے مزید اقدامات کرے۔

صدر جو بائیڈن کی انتظامیہ نے بیرون ملک تنقید اور امریکی یونیورسٹی کیمپس میں بڑھتے ہوئے غصے کے باوجود حماس کے خلاف اس کی انتھک مہم میں اسرائیل کی حمایت کی ہے بلکہ اپنے اتحادی پر زور دیا ہے کہ وہ شہریوں کے تحفظ کے لیے مزید اقدامات کرے۔

انٹونی بلنکن نے پیر کو ریاض میں خلیجی عرب وزرائے خارجہ کو بتایا کہ ’صدر بائیڈن نے زور دیا ہے کہ اسرائیل غزہ میں انسانی مصائب، شہری نقصانات اور امدادی کارکنوں کی حفاظت کے لیے مخصوص، ٹھوس اقدامات کرے۔‘

انہوں نے کہا کہ ’ہم نے پچھلے چند ہفتوں میں پیش رفت دیکھی ہے جس میں نئی ​​کراسنگ کا افتتاح، غزہ میں امدادی ترسیل کا حجم اور امریکی میری ٹائم کوریڈور کی تعمیر (جو آنے والے ہفتوں میں کُھل جائے گی) شامل ہے لیکن یہ کافی نہیں۔ ہمیں اب بھی غزہ اور اس کے آس پاس مزید امداد حاصل کرنے کی ضرورت ہے۔‘

جو بائیڈن نے اسرائیل کو خبردار کیا ہے کہ یکم اپریل کو اسرائیلی حملے میں ورلڈ سینٹرل کچن کے سات امدادی کارکنوں کی ہلاکت کے بعد مستقبل کی حمایت خطرے میں پڑ گئی ہے۔

بائیڈن انتظامیہ امداد کی ترسیل کے لیے ایک عارضی بندرگاہ بنا کر بحران سے نمٹنے کی کوشش کر رہی ہے۔ 

اردن، جس کے اسرائیل اور ایک بڑی فلسطینی آبادی کے ساتھ سفارتی تعلقات ہیں، خاص طور پر فلسطینی علاقوں میں کشیدگی کے حوالے سے حساس ہے۔

اس سے قبل اپریل میں اردن نے شام میں ایرانی قونصل خانے پر فضائی حملے کے جواب میں اسرائیل پر فائر کیے گئے ایرانی ڈرون کو مار گرایا تھا۔

اردن نے امریکہ کے ساتھ کام کرتے ہوئے زور دیا ہے کہ وہ تنازعات کے بیچ میں نہیں پھنسنا چاہتا۔