’ممکنہ خطرات سے نمٹنے کے اقدامات‘، پاکستان میں موبائل فون سروس معطل

پاکستان میں عام انتخابات کے لیے پولنگ شروع ہونے سے قبل بڑے شہروں میں موبائل فون سروس متاثر ہونے کی شکایات سامنے آنے کے بعد حکومت نے تصدیق کی ہے کہ سروس عارضی طور پر معطل کر دی گئی ہے۔

جمعرات کی صبح وزارت داخلہ کے ترجمان نے ایک بیان میں کہا ہے کہ ملک بھر میں موبائل فون سروس عارضی طور پر بند کرنے کا فیصلہ کیا گیا۔

بیان میں کہا گیا ہے کہ امن و امان قائم رکھنے اور ممکنہ خطرات سے نمٹنے کے لیے حفاظتی اقدامات ضروری ہیں۔

وزارت داخلہ کے ترجمان کے مطابق دہشت گردی کے حالیہ واقعات میں قیمتی جانوں کا ضیاع ہوا۔ پاکستان میں انتخابات کے لیے پولنگ سے قبل الیکشن مہم کے دوران دہشت گردی کے درجنوں واقعات ہوئے۔

دوسری جانب چیف الیکشن کمشنر نے میڈیا سے گفتگو میں کہا کہ وہ موبائل فون سروس کی بحالی کے لیے ہدایات جاری نہیں کریں گے کیونکہ یہ اُن کا کام نہیں۔

ان کا کہنا تھا کہ سکیورٹی محکموں نے دہشت گردی کے خطرے کے پیش نظر یہ اقدام کیا ہے۔

عام انتخابات میں پولنگ سے ایک دن قبل صوبہ بلوچستان کے دو اضلاع پشین اور قلعہ سیف اللہ کیے گئے دھماکوں میں 29 افراد مارے گئے۔

دونوں دھماکوں میں مقامی انتخابی امیدواروں کے حامیوں کو نشانہ بنایا گیا۔

ملک کے چاروں صوبوں اور وفاقی دارالحکومت اسلام آباد میں موبائل فون کس وقت تک معطل رہے گی اس حوالے سے کچھ نہیں بتایا گیا۔

پاکستان ٹیلی کمیونیکیشن اتھارٹی نے پولنگ ڈے سے ایک دن قبل ایک بیان میں کہا تھا کہ انٹرنیٹ سروس بند نہیں کی جائے گی۔