سعودی عرب نے ریاض میں کرائے میں سالانہ اضافہ پانچ سال کے لیے روک دیا

سعودی عرب نے دارالحکومت ریاض میں رینٹل پرائس کو مستحکم کرنے کے لیے نئے ضوابط متعارف کرائے ہیں۔

سعودی ولی عہد و وزیر اعظم شہزادہ محمد بن سلمان کی ہدایت پرعمل کرتے ہوئے ریاض شہر کے لیے رہائشی اور کمرشل پراپرٹیز کے کرایوں میں سالانہ اضافہ پانچ برس کے لیے روک دیا گیا ہے۔

کابینہ کی طرف سے منظور کردہ اور شاہی فرمان کے ذریعے نافذ کیے جانے والے ضوابط دارالحکومت میں بڑھتے ہوئے کرایوں سے نمنٹے اور پراپرٹی مارکیٹ میں توازن بحال کرنے کے لیے بنائے گئے ہیں۔

سعودی خبررساں ایجنسی ’ایس پی اے‘ کے مطابق ریاض شہر کے لیے گزشتہ کئی برسوں سے پراپرٹی سیکٹر میں کرایوں میں ہونے والے غیرمعمولی اضافے کا نوٹس لیتے ہوئے سعودی وزرا کونسل نے قرار داد پاس کی تھی۔

قرارداد میں سفارش کی گئی تھی کہ کرایوں میں ہونے والے اضافے کے رجحان کو روکا جائے۔

 پراپرٹی جنرل اتھارٹی کو ہدایت کی گئی تھی کہ وہ جائیداد کے مالکان اور کرایہ داروں کے حقوق کا تحفظ کرتے ہوئے جامع حل تلاش کریں۔

کابینہ کے فیصلے پر ایوان شاہی سے بھی پراپرٹی کے شعبے کی صورتحال کو منظم اور فریقین کے حقوق کے تحفظ کو یقینی بنانے کے لیے احکامات صادر کیے۔

اتھارٹی نے جامع انداز میں تمام نکات کا جائزہ لینے کے بعد اپنی رپورٹ پیش کی جسے منظور کرلیا گیا۔

اتھارٹی کی رپورٹ پر عمل درآمد جمعرات 25 ستمبر 2025 سے کرنے کے احکامات صادر کر دیے گئے۔ 5 برس تک پراپرٹی کے کرایوں میں اضافہ نہیں کیا جائے گا۔

 کرایہ نامے میں جو کرایہ ( سابقہ یا نئے کرایے ) فریقین نے طے کیے وہ پانچ برس تک برقرار رہیں گے۔ اس کے بعد متعلقہ کمیٹی کی جانب سے نظر ثانی کی جائے گی۔