عوامی مینڈیٹ کے تحفظ کے لیے جمہوری اور سیاسی راستہ اختیار کیا جائے گا، بیرسٹر گوہر

مسلم لیگ ن اور جے یو آئی کے رابطے بحال، مولانا ’موم‘ ہو جائیں گے؟

ن لیگ کے ایاز صادق سپیکر اور پیپلز پارٹی کے غلام مصطفیٰ شاہ ڈپٹی سپیکر قومی اسمبلی منتخب

پولیس ایک ہفتے میں جھوٹے مقدمات ختم کرے ورنہ سزا کے لیے تیار ہوجائے: علی امین گنڈا پور

مشکل اصلاحات اور آئی ایم ایف سے مذاکرات، نیا وزیر خزانہ کون ہو گا؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اسلام آباد پریس کلب کے باہر پی ٹی آئی کا احتجاج

انتخابات میں مبینہ دھاندلی کے خلاف احتجاج کے لیے پی ٹی آئی کے کارکن اسلام آباد پریس کلب کے باہر جمع ہونا شروع ہو گئے ہیں۔

پریس کلب کے باہر پولیس کی بھاری نفری بھی تعینات ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وزارت عظمیٰ کے لیے شہباز شریف اور عمر ایوب کے کاغذات نامزدگی جمع

شہباز شریف کے لیے 8  جبکہ عمر ایوب کے لیے 4  کاغذات نامزدگی جمع کرائے گئے۔

وزارت عظمیٰ کے کاغذات نامزدگی سیکریٹری جنرل قومی اسمبلی طاہر حسین نے وصول کیے۔

اس موقع پر سپیشل سیکریٹری قانون سازی قومی اسمبلی محمد مشتاق اور اسپیشل سیکریٹری سید شمعون ہاشمی بھی موجود تھے۔

کاغذات نامزدگی کی جانچ پڑتال تین بجے تک مکمل کی جائے گی۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عوامی مینڈیٹ کے تحفظ کے لیے جمہوری اور سیاسی راستہ اختیار کیا جائے گا، بیرسٹر گوہر

پاکستان تحریک انصاف کے رہنما بیرسٹر گوہر علی خان نے کہا ہے کہ عوامی مینڈیٹ کے تحفظ کے لیے ہر ممکن قانونی، جمہوری اور سیاسی رستہ اختیار کیا جائے گا۔

سنیچر کو بیرسٹر گوہر نے ٹویٹ کیا کہ بانی چیئرمین عمران خان کی کال پر آج ملک بھر میں مختص کیے گئے مقامات پر نہایت بھرپور انداز میں پرامن احتجاج کیا جائے گا۔

’عوام سے اپیل ہے کہ اپنے ووٹ کی حرمت اور مینڈیٹ چوروں سے اپنا مینڈیٹ واپس نکلوانے کے لیے نکلیں اور اس پُرامن احتجاج میں شریک ہوں۔‘

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بلوچستان اسمبلی کا اجلاس، میر سرفراز بگٹی وزیراعلٰی منتخب 

 

میر سرفراز احمد بگٹی 41 ووٹ لے کر وزیراعلٰی بلوچستان منتخب ہو گئے ہیں۔

وزیراعلٰی بلوچستان کے انتخاب کے لیے پاکستان پیپلز پارٹی، پاکستان مسلم لیگ (ن)، بلوچستان عوامی پارٹی سمیت اتحادی جماعتوں کے اراکین نے ووٹ دیا۔

نیشنل پارٹی اور جمعیت علمائے اسلام بلوچستان کے اراکین اسمبلی نے رائے شماری میں حصہ نہیں لیا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سنی اتحاد کونسل نے صدارتی امیدوار کے لیے محمود خان اچکزئی کو نامزد کر دیا

 

سنی اتحاد کونسل نے صدارتی امیدوار کے لیے محمود خان اچکزئی کو نامزد کر دیا ہے۔

سنیچر کو پی ٹی آئی کے ترجمان شعیب شاہین نے اُردو نیوز کو بتایا کہ صدارتی انتخابات کے لیے اُن کا امیدوار محمود خان اچکزئی ہوں گے۔ 

ان کا کہنا تھا کہ ’پارٹی نے عمران خان کی ہدایات کے مطابق متفقہ طور پر فیصلہ کیا ہے کہ ہم اپنی طرف سے صدارتی انتخابات کے لیے محمود خان اچکزئی کے کاغذت نامزدگی جمع کرائیں گے۔‘

ان کا کہنا تھا کہ دونوں طرف سیاسی جماعتوں سے بات ہو گئی ہے۔

 مستقبل میں محمود خان اچکزئی کے ساتھ اتحاد یا الائنس سے متعلق انہوں نے بتایا کہ ان کی پارٹی اِس وقت صدارتی انتخابات کا سوچ رہی ہے اس لیے کسی بھی الائنس سے متعلق فیصلہ بعد میں کیا جائے گا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

خیبر پختونخوا میں بارش اور لینڈ سلائیڈنگ، کم سے کم 17 افراد ہلاک

خیبر پختونخوا کے قدرتی آفات سے نمٹنے کے ادارے (پی ڈی ایم اے) نے کہا ہے کہ گزشتہ دو دنوں میں صوبے بھرمیں جاری بارشوں اور لینڈ سلائیڈنگ سے حادثات کے نتجے میں اب تک 17 افراد ہلاک جبکہ 23 افراد زخمی ہیں۔

ڈی جی پی ڈی ایم اے محمد قیصر خان کا کہنا ہے کہ برفباری اور لینڈسلائیڈنگ سے بند سڑکوں کو کھلولنے کے لیے اقدامات کیے جا رہے ہیں جبکہ مالم جبہ میں شدید برفباری سے محصور چھ سیاحوں کو ریسکیوکر لیا گیا ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

صدارتی انتخاب کے لیے آصف علی زرداری کے کاغذات نامزدگی جمع

وزیراعلٰی سندھ سید مراد علی شاہ نے صدارتی انتخاب کے لیے پارٹی سربراہ آصف علی زرداری کے کاغذات نامزدگی جمع کرا دیے۔

وزیراعلٰی سندھ  کاغذات نامزدگی جمع کرانے کے لیے پارٹی ایم پی ایز کی بڑی تعداد کے ساتھ ہائی کورٹ پہنچے۔

وزیراعلیٰ سندھ سید مراد علی شاہ نے کاغذات نامزدگی چیف جسٹس سندھ ہائی کورٹ جناب جسٹس عقیل عباسی کے پاس جمع کرائے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پی ٹی آئی کا احتجاج، اسلام آباد میں سکیورٹی ہائی الرٹ

اسلام آباد پولیس نے ایک بیان میں کہا ہے کہ دارالحکومت میں سکیورٹی ہئی الرٹ ہے اور دفعہ 144 نافذالعمل ہے۔

سنیچر کو ایکس پر پوسٹ کیے گئے ایک بیان میں اسلام آباد پولیس نے کہا ہے کہ ضلع بھر میں گشت کو بڑھا دیا گیا ہے اور ناکہ پوائنٹس پر چیکنگ سخت کر دی گئی ہے۔

’سی ٹی ڈی کے خصوصی دستے گشت پر تعینات کیے گئے جو کسی بھی ہنگامی صورتحال سے نمٹنے کے لیے ہمہ وقت تیار ہیں۔ شہری دوران سفر ضروری شناختی دستاویزات ہمراہ رکھیں اور دوران چیکنگ پولیس کے ساتھ تعاون کریں۔‘

انتخابات میں مبینہ دھاندلی، پاکستان تحریک انصاف آج احتجاج کرے گی

انتخابات میں مبینہ دھاندلی کے خلاف پاکستان تحریک انصاف نے آج احتجاج کی کال دی ہے۔

پاکستان تحریک انصاف کے رہنما شیر افضل مروت نے راولپنڈی اور اسلام آباد جبکہ حماد اظہر نے پنجاب کے مختلف شہروں میں احتجاج کے مقامات شیئر کیے ہیں۔

شیر افضل مروت نے ایکس پر ایک ویڈیو بیان میں کہا کہ ’اسلام آباد اور راولپنڈی میں ریلی کی قیادت میں خود کروں گا کل کا احتجاج پاکستان کی تاریخ کا سب سے بڑا احتجاج ہو گا۔‘

ان کا کہنا تھا کہ بارش کے باوجود اپنا احتجاج ریکارڈ کریں گے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بلوچستان اسمبلی کا اجلاس، آج نیا قائد ایوان منتخب ہو گا

بلوچستان اسمبلی کے قائد ایوان کے انتخاب کے لیے نومنتخب سپیکر کیپٹن ریٹائرڈ عبدالخالق اچکزئی کی صدارت میں اجلاس شروع ہو گیا ہے۔

پاکستان پیپلز پارٹی سے تعلق رکھنے والے میر سرفراز احمد بگٹی بلوچستان کے بلامقابلہ نئے وزیراعلٰی ہوں گے۔

جمعے کو سپیکر کیپٹن ریٹائرڈ عبدالخالق اچکزئی نے اعلان کیا تھا کہ وزارت اعلٰی کے خواہش مند امیدوار جمعے کی شام پانچ بجے تک کاغذات نامزدگی جمع کرا سکتے ہیں۔

تاہم مقررہ وقت تک صرف سرفراز بگٹی نے کاغذات جمع کرائے۔ ان کے مقابلے میں کسی دوسرے امیدوار نے کاغذات جمع نہیں کرائے۔ اس طرح سرفراز بگٹی بلامقابلہ وزیراعلٰی بلوچستان منتخب ہو گئے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بارش کے باعث پی ایس ایل کا میچ متاثر ہونے کا خدشہ

پاکستان سپر لیگ (پی ایس ایل) کے جاری نویں ایڈیشن کے حوالے سے ایک بری خبر سامنے آئی ہے کہ آج راولپنڈی میں ہونے والے دونوں میچز بارش سے متاثر ہو سکتے ہیں۔

پنڈی کرکٹ سٹیڈیم میں پی ایس ایل کے دو میچز کھیلے جانے ہیں۔

پہلے میچ میں دوپہر دو بجے لاہور قلندرز کا مقابلہ پشاور زلمی سے ہو گا جبکہ دوسرا میچ شام سات بجے اسلام آباد یونائیٹڈ اور کوئٹہ گلیڈی ایٹرز کے درمیان کھیلا جائے گا۔

تاہم جمعے سے جاری بارش کا سلسلہ اب سے کچھ دیر پہلے تک جاری تھا جس کی وجہ سے خدشہ ہے کہ کم از کم پہلا میچ متاثر ہو گا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وزیراعظم کے عہدے کے لیے کاغذات نامزدگی آج جمع ہوں گے

قومی اسمبلی سیکریٹریٹ سے جاری انتخابی شیڈول کے مطابق وزیراعظم کے عہدے کے لیے کاغذات نامزدگی آج جمع کرائے جائیں گے۔

کاغذات نامزدگی کی جانچ پڑتال دن سہ پہر تین بجے ہو گی۔

کاغذات نامزدگی قومی اسمبلی کی قانون سازی برانچ سے حاصل کیے جا سکتے ہیں۔

ملک کے نئے وزیراعظم کا انتخاب کل اتوار کو ہو گا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

صدارتی انتخاب کا شیڈول جاری

الیکشن کمیشن نے 9 مارچ کو ہونے والے صدارتی انتخاب کے لیے شیڈول جاری کر دیا ہے۔

شیڈول کے مطابق امیدوار اسلام آباد اور چاروں صوبائی دارالحکومتوں میں پریذائیڈنگ افسروں کو اپنے کاغذات نامزدگی آج دوپہر 12 بجے تک جمع کرا سکیں گے۔

کاغذات نامزدگی کی جانچ پڑتال پیر کو ہو گی ،امیدوار اپنے کاغذات نامزدگی منگل تک واپس لے سکیں گے جبکہ امیدواروں کی حتمی فہرست اسی روز آویزاں کی جائے گی۔

امیدوار چھ تاریخ تک دستبردار ہو سکیں گے۔ جبکہ صدر کے عہدے کے لیے پولنگ 9 مارچ کو پارلیمنٹ ہاؤس اسلام آباد اور چاروں صوبائی اسمبلیوں میں ہو گی۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پاکستان کے بیشتر علاقوں میں بارش اور برف باری 

محکمہ موسمیات پاکستان نے آج بھی ملک کے بیشتر علاقوں میں آندھی اور گرج چمک کے ساتھ موسلادھار بارش کی پیش گوئی کی ہے۔

سنیچر کو ملک کے مختلف علاقوں میں شدید برف باری اور چند مقامات پر ژالہ باری ہونے کا امکان ہے جبکہ بارش اور برف باری سے متاثرہ علاقوں میں روزمرہ کے معاملات متاثر ہونے کا بھی خدشہ ظاہر کیا گیا ہے۔

محکمہ موسمیات کے مطابق ’طاقتورمغربی ہواؤں کا سلسلہ 29 فروری کو ملک کے مغربی علاقوں میں داخل ہوا اور یکم مارچ کو ملک کے بیشتر علاقوں کو اپنی لپیٹ میں لے لیا جو دو مارچ تک موجود رہے گا۔‘