شاہ سلمان کا نریندر مودی سے رابطہ

خادم حرمین شریفین شاہ سلمان بن عبدالعزیز نے بدھ کو انڈیا کے وزیراعظم نریندر مودی سے ٹیلیفون پر رابطہ کیا ہے۔ 

سعودی خبررساں ادارے ایس پی اے کے مطابق  ٹیلی فونک رابطے کے دوران  شاہ سلمان نے اس سال سعودی عرب کی زیر قیادت جی 20 کی سرگرمیوں، کورونا وبا کے چیلنجوں سے نمٹنے اور وبا کے سنگین اثرات کم کرنے کے لیے جی 20 کی کاوشوں کا جائزہ لیا- 

شاہ سلمان نے زود دیا کہ عالمی معیشت اور اقوام عالم پر وبا کے سنگین اثرات کو کم کرنے کے لیے جی 20 میں شامل ملکوں کو اپنا مشن جاری رکھنا ہوگا۔

شاہ سلمان نے نریندر مودی سے یہ بھی کہا کہ سعودی عرب کورونا کی وبا سے نمٹنے کے لیے مشترکہ جدوجہد جاری رکھنا چاہتا ہے۔ 

انڈین وزیراعظم نریندر مودی نے جی 20 کی منفرد قیادت پرسعودی عرب کی ستائش کی۔

انہوں نے اس اعتماد کا بھی اظہار کیا کہ جی 20 میں شامل ممالک کے اجلاسوں کے نتائج سے پوری دنیا فائدہ اٹھائے گی۔ 

دونوں رہنماؤں نے سعودی عرب اور انڈیا کے درمیان موجود تعاون اور مختلف شعبوں میں اسے فروغ دینے کے طریقوں کا بھی جائزہ لیا ہے۔