ظہران مال میں لگنے والی آگ پر قابو پالیا گیا

سعودی عرب کے مشرقی ریجن میں محکمہ شہری دفاع نے ظہران مال میں لگنے والی آگ پر قابو پالیا ہے۔

اخبار 24 کے مطابق محکمہ شہری دفاع کے ٹوئٹر اکاونٹ پر شیئر کی جانے والی وڈیو میں دیکھا جاسکتا ہے کہ مال میں لگنے والی آگ سے کئی تجارتی مراکز متاثر ہوئے۔ آگ بجھانے کی کارروائی میں متعدد اداروں نے شہری دفاع کے ماتحت فائر بریگیڈ کی ٹیموں کے ساتھ کام کیا۔

یاد رہے کہ جمعے کی صبح آگ لگنے کی اطلاع پر شہری دفاع کی ٹیمیں جائے وقوعہ پہنچ گئی تھیں۔ آگ بجھانے کے بعد ظہران مال کی کولنگ کا بھی اہتمام کیا گیا۔ 

آتشزدگی کی تصاویر اور وڈیو کلپس سوشل میڈیا پر وائرل ہیں جن میں دیکھا جاسکتا ہے کہ عمارت سے دھویں کے بادل اٹھ رہے ہیں جبکہ شہری دفاع کی ٹیمیں آگ بجھانے میں مصروف ہیں۔ 

آگ بجھانے کی کارروائی میں فائر بریگیڈ کے ہیلی کاپٹروں نے بھی حصہ لیا۔