امارات سے آنے عمرہ زائرین کے لیے فلوویکسین لازمی قرار

متحدہ عرب امارات کی وزارت صحت نے عمرہ  اور حج پر جانے والوں کے لیے انفلوائنزا ویکسین لازمی قرار دے دی ہے۔ عمل درآمد منگل 26 مارچ 2024 سے  کیا جائے گا۔

الامارات الیوم کے مطابق اماراتی وزارت صحت اور کمیونٹی پروٹیکشن نے اس بات کی تصدیق کی ہے کہ امارات سے عمرہ پر جانے والے تمام لوگوں کو ویکسینیشن کی تمام مطلوبہ بنیادی خوراکیں  لینا لازمی ہے جس میں خاص طور پر انفلوائنزا ویکسین شامل ہے۔

وزارت صحت کا کہنا ہے کہ منگل 26 مارچ 2024 سے عمرہ پر جانے والے تمام افراد کے لیے انفلوائنزا ویکسینیشن  کارڈ پیش کرنا ضروری ہوگا۔

وزارت کا کہنا ہے کہ عمرہ پرجانے کے خواہشمندوں کو چاہئے کہ وہ سفر سے کم از کم 10 روز قبل ویکسین لگوانے کا اہتمام کریں تاکہ فلو وائرس سے بہتر طورپر حفاظت ہو سکے۔

محکمہ صحت عامہ اوراحتیاطی امور کی ڈائریکٹر ڈاکٹر ندی المرزوقی نے کہا  کہ حفاظتی ویکسین  لگانے والے مختلف قسم کے امراض سے محفوظ ہوجاتے ہیں۔

 ضرورت اس بات کی ہے کہ عمرہ اور حج پر جانے والے خاص طور پر معمر، حاملہ اور دودھ پلانے والی خواتین پہلی فرصت میں ویکسین لگوانے کا اہتمام کریں۔

ڈاکٹر المزروقی نے عمرہ اور حج کے مسافروں سے یہ بھی کہا کہ وہ مناسک کی ادائیگی کے دوران صحت مسائل سے بچنے کے لیے  احتیاطی تدابیر پر عمل کریں اور سفر کے دوران گرمی، تھکن اور جسمانی دباؤ سے بھی بچیں جس سے بعض اوقات بیماری اور صحت مسائل میں مبتلا ہونے کے امکانات بڑھ جاتے ہیں اس کے علاوہ صحت مند غذا کو یقینی بنائیں۔

امارات کی خبروں کے لیے ”اردو نیوز یو اے ای“ گروپ جوائن کریں