خود کار گاڑیاں جلد سعودی عرب پہنچ جائیں گی: ایلون مسک

ٹیسلا کمپنی کے سربراہ ایلون مسک نے کہا ہے کہ خود کار ’سیلف ڈرائیونگ‘ گاڑیاں مستقبل قریب میں سعودی عرب پہنچ جائیں گی۔

سبق ویب سائٹ کے مطابق ان کا یہ بیان کمپنی کی جانب سے اپنی ٹیکنالوجیز کو نئی منڈیوں میں وسعت دینے کے منصوبوں کے تحت سامنے آیا ہے۔

ان منڈیوں میں سعودی عرب بھی شامل ہے جو سمارٹ ٹرانسپورٹ ٹیکنالوجی کو اپنانے کے حوالے سے ابھرتی ہوئی منڈی شمار ہوتی ہے۔

اس سے قبل ریاض میں منعقدہ سعودی، امریکی سرمایہ کاری فورم کے دوران نشست میں ٹیسلا اور اسپیس ایکس کے سی ای او ایلون مسک اور سعودی وزیر برائے مواصلات و انفارمیشن ٹیکنالوجی انجینئر عبداللہ السواحہ شریک ہوئے۔

نشست کے دوران مسک نے وضاحت کی کہ انسانی نما روبوٹس پیداواری عمل میں انقلابی حیثیت رکھتے ہیں جو عالمی معیشت کے حجم کو دس گنا بڑھا سکتے ہیں اور ایک ایسے معاشی نظام کی بنیاد رکھ سکتے ہیں جو فراوانی اور اعلیٰ آمدنی پر مبنی ہو۔