متحدہ عرب امارات ابوظبی کی شیخ زاید گرینڈ مسجد کو ایک مرتبہ پھرعالمی سطح پر تسلیم کیا گیا ہے۔

 سیاحتی ویب سائٹ ٹریپ ایڈوائزر کی عالمی رپورٹ میں 2025 کے ٹاپ ایٹریکشنز مقامات میں آٹھویں نمبر پر ہے۔

یہ مسجد مسلسل دوسرے سال مشرق وسطی کے ثقافتی لینڈ مارک کے طور پر بھی سرفہرست ہے اور اپنا اعزاز برقرار رکھا۔

 شیخ زاید مسجد کو دنیا بھر کے تمام سیاحتی لینڈ مارکس کے ایک فیصد بہترین مقامات میں شامل کیا گیا ہے۔ یہ درجہ بندی دنیا بھر کے 80 لاکھ سے زیادہ لینڈ مارکس کے جامع تجزیے اور رائے پر مبنی ہے۔

فجیرہ میں واقع شیخ زاید مسجد نے دنیا کے ٹاپ 10 فیصد سیاحتی مقامات کی فہرست میں بھی جگہ بنا لی ہے، جو متحدہ عرب امارات کی ثقافتی سیاحت میں ایک اور سنگِ میل ہے۔

شیخ زاید گرینڈ مسجد سینٹر کے ڈائریکٹر جنرل ڈاکٹر یوسف العبیدلی کا کہنا تھا  مسجد اب سالانہ 70 لاکھ سے زیادہ زائرین کا خیرمقدم کر رہی ہے۔ یہ ثقافتی و مذہبی ہم آہنگی کی عالمی علامت بن چکی ہے۔

واضح رہے ابوظبی کی شیخ زاید گرینڈ مسجد کا افتتاح 2007 میں ہوا تھا۔ یہ دنیا کی سب سے بڑی مساجد میں سے ایک اور اسلامی فن تعمیر اور ڈیزائن کو یکجا کرنے والی آرکیٹیکچرل آئیکن ہے۔