شاہ سلمان نے ’سٹیزن اکاؤنٹ پروگرام‘ میں ایک برس کی توسیع کر دی

خادم حرمین شریفین شاہ سلمان بن عبدالعزیز نے سٹیزن اکاؤنٹ پروگرام میں ایک برس کے لیے توسیع کی ہدایت کی ہے۔

ایس پی اے کے مطابق ولی عہد شہزادہ محمد بن سلمان نے ’سیٹزن اکاؤنٹ پروگرام‘ کی مدت میں توسیع کی سفارش کی تھی۔

 ایوان شاہی سے شہریوں کے لیے امدادی پروگرام اور اس میں رجسٹریشن کے عمل کو سال 2026 کے آخر تک جاری رکھنے کے احکامات صادر کردیے گئے۔

اس پروگرام کا اعلان دسمبر 2016 میں کیا گیا تھا اور اسے فروری 2017 میں رجسٹریشن کے لیے کھولا گیا تھا۔ یہ سعودی خاندانوں کو مختلف معاشی اصلاحات کے اثرات سے بچانے کے لیے شروع کیا گیا تھا جس سے معاشرے کے کچھ طبقات پر اضافی بوجھ پڑ سکتا تھا۔

وزیر افرادی قوت وسماجی بہبود آبادی احمد سلیمان الراجحی نے سیٹزن اکاؤنٹ پروگرام میں مزید ایک برس کے لیے دی جانے والی توسیع کی منظوری پر سعودی قیادت کا شکریہ ادا کیا ہے۔

الراجحی نے کہا کہ ’مملکت کی اعلٰی قیادت کی جانب سے شہریوں کی ضروریات کو مدنظر رکھتے ہوئے انہیں سہولت فراہم کرنے کے لیے پروگرام میں مزید توسیع کی منظوری دی گئی۔‘