قرآن میوزیم میں خانہ کعبہ کے دروازے کا ماڈل توجہ کا مرکز

مکہ مکرمہ حرا کلچرل ڈسٹرکٹ میں واقع قرآن کریم میوزیم میں خانہ کعبہ کے دروازے کا ماڈل( ریپلیکا) کی نمائش کی جا رہی ہے، یہ مثال ہے کہ اسلامی تہذیب میں تخلیقی صلاحیتوں اور روحانی اقدار کو کیسے اکھٹے کیا جاتا ہے۔

سعودی خبررساں ایجنسی (ایس پی اے) کے مطابق کعبے کے دروازے کے اس ماڈل پر عربی رسم الخط میں اسلامی نقوش کے ساتھ قرآنی آیات کو کنندہ کیا گیا ہے، جو منفرد آرٹسٹک انداز ہے۔

میوزیم میں جو ماڈل رکھا گیا ہے، اصل دروازہ، شاہ خالد بن عبدالعزیز کے عہد کا ہے، اسے 1979 میں خالص سونے سے تیار کیا گیا تھا۔

دروازے پر اسلامی نقش و نگار کے ساتھ قرآنی آیات کنندہ کی گئی ہیں جو اس ڈیزائن کا لازمی حصہ ہیں۔ یہ مسلمانوں کے دلوں میں کعبے کی حیثیت اور تقدس کی عکا سی کرتی ہیں۔

حرا کلچرل ڈسٹرکٹ میں موجود ریپلیکا، عربی خطاطی کی خوبصورتی کو اجاگر کرتا ہے، جو تاریخی طور پر قرآن کی تحریر سے وابستہ سب سے اہم اسلامی فنون میں سے ایک ہے، آیات کو ایک متوازن ساخت میں ترتیب دیا گیا ہے، جو کاریگری کی مہارت کو ظاہر کرتی ہیں، اس کے ساتھ پھول اور ہندسی نقوش اسے منفرد بصری گہری دیتے ہیں۔

حراء کلچرل ڈسٹرکٹ کا میوزیم دراصل مکہ میں جامع علمی و سیاحتی مرکز کی حثیت کا حامل ہے، جہاں انتظامیہ کی جانب سے اسلام کے ابتدائی ادوار کی مرحلہ وار اس طرح عکاسی کی گئی ہے کہ زائرین خود کو چند لمحات کے لیے ان ہی ادوار میں محسوس کرتے ہیں۔