’کفالت تبدیل کرانے کے بعد اقامہ کارڈ دوسرا پرنٹ کرانا ہوگا؟

 سعودی عرب میں غیر ملکی کارکن کے اقامے میں ان کا پیشہ درج ہوتا ہے۔ قانون کے مطابق اقامہ میں درج پیشے کے مطابق ہی کارکن کو کام کرنے کی اجازت ہوتی ہے۔

وہ افراد جو اپنے مقررہ پیشے کے مطابق کام نہیں کرتے قانونی خلاف ورزی کے مرتکب ہوتے ہیں جس پرانہیں جرمانے کا بھی سامنا کرنا پڑتا ہے۔

سعودی وزارت افرادی قوت کے پلیٹ فارم ’قوی ‘ پرایک شخص نے دریافت کیا ’میری عمر67 برس ہے جبکہ پیشہ عامل نظافہ مبانی کا ہے، کیا کفالت کی تبدیلی کرائی جاسکتی ہے؟‘۔ 

سوال کے جواب میں ’قوی‘پلیٹ فارم کا کہنا تھا کہ’ اس صورت میں قوی پلیٹ فارم پر کفالت کی تبدیلی کے لیے عمرکا زیادہ ہونا قابل اعتراض امر نہیں ہوتا‘۔  

’کفالت کی تبدیلی کےلیے قوی پلیٹ فارم پردرخواست اپ لوڈ کرائی جاسکتی ہے جہاں ملازمت کے معاہدے کو دیکھتے ہوئے اسے فریقین ی جانب سے منظورکرنے کے بعد قوی پلیٹ فارم پراس کی منظوری کے احکامات دیے جاتے ہیں‘۔ 

واضح رہے وزارت افرادی قوت وسماجی بہبود آبادی کی جانب سے مملکت میں مقیم غیرملکی کارکنوں کے معاملات جلد نمٹانے کےلیے قوی پلیٹ فارم متعارف کرایا ہے۔ 

قوی پلیٹ فارم کا مقصد مملکت کی لیبرمارکیٹ کے معاملات کوبہتربنانا اورکارکنوں کو سہولت فراہم کرنا ہے تاکہ معاملات بہتر طورپرجلد حل ہوں اورکارکنوں کو تاخیر کا سامنا نہ کرنا پڑے۔ 

قوی پلیٹ فارم کے ذریعے کفالت کی تبدیلی کےلیے لازمی ہے کہ جس ادارے یا کمپنی میں کفالت تبدیل کرانا مقصود ہووہاں سے ملازمت کا ڈیجیٹل معاہدہ تیارکرکے قوی پلیٹ فارم پراپ لوڈ کیاجائے جسے آجرواجیردونوں منظورکریں بعدازاں منظورشدہ معاہدے کی تصدیق قوی پلیٹ فارم پرکی جاتی ہے۔ 

قوی پلیٹ فارم پرمعاہدے کی تصدیق ہونے کے بعد وزارت افرادی قوت وسماجی بہبود آبادی کی جانب سے کفالت کی تبدیلی کے لیے نئے آجر کے اکاونٹ میں ورک پرمٹ جاری کیاجاتا ہے بعدازاں جوازات کے سسٹم میں نیا اقامہ کارڈ پرنٹ کرنے کے ساتھ ساتھ ابشراکاونٹ میں بھی معلومات تبدیل کی جاتی ہیں۔ 

 جوازات کے ٹوئٹرپرایک شخص نے دریافت کیا ’کفالت تبدیل کرائی ہے۔ اس صورت میں اقامہ کارڈ نیا پرنٹ ہوگا یا وہی پرانا کارڈ کارآمد ہوسکتا ہے؟‘۔ 

سوال کے جواب میں جوازات کا کہنا تھا کہ ’کفالت تبدیل کرانے کے بعد اقامہ کارڈ دوسرا پرنٹ کرانا ہوگا‘۔

کارڈ پرنٹ کے حوالے سے جوازات کا مزید کہنا تھا کہ ’مملکت میں ڈیجیٹل سسٹم کے ذریعے اقامہ کارڈ اپنے موبائل پربھی اوپن کیاجاسکتا ہے‘۔ 

واضح رہے جوازات کے ضوابط کے تحت اقامہ کارڈ میں کارکن کے کفیل یا کمپنی کا نام علاوہ ازیں آجر کا سیریل کمپیوٹرنمبر بھی درج ہوتا ہے۔ 

کفالت تبدیل کرائے جانے کے بعد کفیل کا نام اورسیریل نمبربھی تبدیل ہوجاتا ہے جس کے بعد دوسرا کارڈ جاری کرانے کی ضرورت ہوتی۔  

کارکن کا نیا کارڈ پرنٹ کرانے کےلیے کارکن کویہ حق نہیں کہ وہ خود جوازات کے کسی دفترسے رجوع کرے کارکن کے کفیل یا کمپنی کے متعلقہ شعبے کے اہلکار کے ذمہ ہوتا ہے کہ وہ کارکن کا اقامہ کارڈ جوازات سے حاصل کرے۔