جدہ سے انیسویں خصوصی پرواز، مزید 140 پاکستانیوں کی واپسی
جدہ سے انیسویں خصوصی پرواز، مزید 140 پاکستانیوں کی واپسی
پیر 15 جون 2020 16:13
سعودی عرب سے پاکستانیوں کی واپسی کے لیے خصوصی پروازوں کا سلسلہ جاری ہے۔ پاکستان انٹرنیشنل ایئر لائنز (پی آئی اے) کی خصوصی پرواز پی کے 9742 پیر کی دوپہر 141 مسافروں کو لے کر جدہ سے پشاور کے لیے روانہ ہوئی ہے۔
قونصل جنرل کی جانب سے پریس قونصل محمد ارشد منیر مسافروں کو الوداع کرنے کے لیے جدہ ایئر پورٹ پر موجود تھے۔
یاد رہے کہ اتوار کو پی آئی اے کی پرواز پی کے 9764 جدہ سے 140 مسافر فیصل آباد جبکہ دوسری پرواز پی کے 9736 سے 140 مسافر پشاور گئے تھے۔
کووڈ 19 کے پھیلنے کی وجہ سے معمول کی بین الاقوامی پروازوں کی معطلی کے بعد حکومت پاکستان نے سعودی عرب سمیت مختلف ممالک سے پھنسے ہوئے پاکستانیوں کو وطن واپس بھیجنے کے لیے پی آئی اے کی خصوصی پروازوں کی کارروائی کا آغاز کیا تھا۔
یکم مئی 2020 سے اب تک جدہ سے پی آئی اے کی انیسویں خصوصی پرواز تھی۔ تین ہزار 650 سے زیادہ پاکستانی ان خصوصی پروازوں کے ذریعے سعودی عرب کے مغربی علاقے سے وطن واپس پہنچ چکے ہیں۔
ریاض سے 14 خصوصی پروازوں کے ذریعے دو ہزار 494 پاکستانی وطن واپس جا چکے ہیں۔ دمام سے بھی خصوصی پروازیں چلائی گئی ہیں۔
ریاض میں سفارتخانہ اور جدہ میں پاکستان قونصلیٹ ، پی آئی اے کے قریبی تعاون سے اس خصوصی پروازوں کے انتظامات دیکھ رہا ہے۔
سعودی عرب میں اس وقت ہزاروں پاکستانی وطن واپسی کے خواہش مند ہیں جن میں سے بیشتر وزٹ یا بزنس ویزے پر آئے تھے یا وہ سفری پابندیوں کے باعث واپس نہیں جا سکے تھے۔