Sorry, you need to enable JavaScript to visit this website.

زمبابوے کو 26 رنز سے شکست

شاہین شاہ آفریدی نے پانچ جبکہ وہاب ریاض نے 4 کھلاڑیوں کو آؤٹ کیا (فوٹو: اے ایف پی)
پاکستان نے زمبابوے کو پنڈی کرکٹ سٹیڈیم میں کھیلے گئے پہلے ایک روزہ میچ میں 26 رنز سے ہرا کر تین ایک روزہ میچز کی سیریز میں ایک صفر کی برتری حاصل کر لی ہے۔
جمعے کو پنڈی کرکٹ سٹیڈیم میں بابر اعظم کی قیادت میں کھیلے گئے پہلے ون ڈے میچ میں پاکستان نے زمبابوے کو 282 رنز کا ہدف دیا تھا۔
ہدف کے تعاقب میں زمبابوے کی ٹیم اننگز کے آغاز سے مشکلات کا شکار ہو گئی اور 49.4 اوورز میں 255 رنز بنا کر آؤٹ ہو گئی۔

 

زمبابوے کی اننگز میں خاص بات برینڈن ٹیلر کی سنچری تھی جنہوں نے 116 گیندوں پر 11 چوکوں اور تین چھکوں کی مدد سے 112 رنز بنائے۔ شاہین شاہ آفریدی کی بال پر وہاب ریاض نے ان کا کیچ لیا۔
زمبابوے کی جانب سے میدھیور نے 55 جبکہ جبکہ اروِن نے 41 رنز بنائے۔
پاکستان کی جانب سے شاہین شاہ آفریدی اور وہاب ریاض نے عمدہ بولنگ کا مظاہرہ کرتے ہوئے مہمان ٹیم کے 9 بلے بازوں کو پویلین کی راہ دکھائی۔
شاہین شاہ آفریدی نے 10 اوورز میں 49 رنز دے کر 5 اور وہاب ریاض نے 9.4 اوورز میں 41 رنز کے عرض 4 کھلاڑیوں کو آؤٹ کیا جبکہ عماد وسیم نے ایک وکٹ حاصل کی۔
اس سے قبل زمبابوے کے خلاف ٹاس جیت کر پاکستان نے پہلے بیٹنگ کا فیصلہ کیا اور مقررہ 50 اوورز میں 8 وکٹوں کے نقصان پر 281 رنز بنائے۔
پاکستان کی جانب سے حارث سہیل نے 71 رنز کی اننگز کھیلی جبکہ امام الحق 58 رنز بنانے کے بعد رن آؤٹ ہوگئے۔ عماد وسیم نے 34 جبکہ فہیم اشرف نے 23 رنز بنائے۔

پاکستان کی جانب سے حارث سہیل نے سب سے زیادہ 71 رنز بنائے (فوٹو: اے ایف پی)

زمبابوے کی جانب سے مزارابانی اور چِسورو نے دو دو وکٹیں حاصل کیں جبکہ ممبا اور سکندر رضا نے ایک ایک کھلاڑی کو آؤٹ کیا۔
پاکستان کی جانب سے حارث رؤف اپنا پہلا ایک روزہ میچ کھیل رہے تھے جب کہ ٹیم کے دیگر کھلاڑیوں میں فخر زمان، عابد علی، امام الحق، حارث سہیل، محمد رضوان، افتخار احمد، فہیم اشرف، عماد وسیم، وہاب ریاض اور شاہین آفریدی شامل تھے۔
پاکستان اور زمبابوے کی ٹیمیں دوسرے ون ڈے میچ کے لیے یکم نومبر کو پنڈی کرکٹ سٹیڈیم میں ہی آمنے سامنے ہوں گی جبکہ تیسرے اور آخری ایک روزہ میچ کے لیے دونوں ٹیمیں تین نومبر کو میدان میں اتریں گی۔
شیڈول کے مطابق میزبان پاکستان اور زمبابوے کے درمیان پہلا ٹی ٹوئنٹی میچ 7 نومبر کو راولپنڈی میں کھیلا جائے گا۔ دونوں ٹیموں کے درمیان دوسرا ٹی ٹوئنٹی میچ 8 نومبر جبکہ تیسرا ٹی ٹوئنٹی میچ 10 نومبر کو پنڈی سٹیڈیم راولپنڈی میں کھیلا جائے گا۔ اس سے قبل یہ میچز لاہور میں کھیلے جانا تھے۔

شیئر: