’2023 کے الیکشنز میں الیکٹرانک ووٹنگ مشین استعمال ہوگی‘

وزیراعظم عمران خان کے مشیر برائے پارلیمانی امور ڈاکٹر بابر اعوان نے کہا ہے کہ ’2023 کے انتخابات میں الیکٹرانک ووٹنگ مشین (ای وی ایم) استعمال ہوگی اور اس کے لیے تمام ضروری قانون سازی 2021 میں ہی کر لی جائے گی۔‘

بدھ کو اسلام آباد میں وزیراعظم کے معاون خصوصی شہباز گل کے ہمراہ پریس کانفرنس کرتے ہوئے بابر اعوان کا مزید کہنا تھا کہ ’الیکٹرانک ووٹنگ میشن کے حوالے سے قانون سازی کے لیے چاہے سینیٹ جانا پڑے یا مشترکہ اجلاس کی طرف، جائیں گے۔‘

انہوں نے کہا کہ ’ای وی ایم کے حوالے سے جب بھی اپوزیشن سے بات کی جاتی ہے، تو وہ کہتی ہے ہم نے مشین نہیں دیکھنی۔‘

انہوں نے دو ٹوک انداز میں کہا کہ ’ہماری اکثریت ہے، اور اگلے الیکشن میں ای وی ایم استعمال ہوگی۔‘

انہوں نے وضاحت کرتے ہوئے کہا کہ ’الیکٹرانک ووٹنگ مشین حکومت نے نہیں بنائی، قومی ادارے نے بنائی ہے۔‘

ان کا مزید کہنا تھا کہ ’تارکین وطن کو ووٹ کا حق دینا تحریک انصاف کے منشور کا حصہ ہے، اس پر عمل درآمد کیا جائے گا اور ای ووٹنگ ہوگی۔‘

بابر اعوان نے 2013 کے انتخابات کا حوالہ دیتے ہوئے کہا کہ ’الیکٹرانک ووٹنگ مشین سے وہ خوفزدہ ہوتا ہے جس نے دھاندلی کرنا ہو۔‘

’دھاندلی کا خوف مشین سے نہیں بلکہ مشین سے انکار میں ہے۔‘

بابر اعوان نے مسلم لیگ ن پر الزام لگاتے ہوئے کہا کہ ’وہ تارکین وطن کو ووٹ کا حق نہیں دینا چاہتی جو کہ توہین عدالت ہے۔‘

انہوں نے دوسرے ممالک کا حوالہ دیتے ہوئے کہا کہ ’وہاں جب کوئی سوال اٹھتا ہے تو فوراً سارے نتائج کھل جاتے ہیں جبکہ یہاں دھرنے دینا پڑتے ہیں۔‘

اس موقع پر شہباز گِل کا کہنا تھا کہ ’جلد ہی وزیراعظم آفس میں ان کی موجودگی میں ای وی ایم کا عملی مظاہرہ کر کے دکھایا جائے گا۔‘

انہوں نے مسلم لیگ ن کے صدر شہباز شریف اور نائب صدر مریم نواز اور کا حوالہ دیتے ہوئے کہا کہ ’ان کا معاملہ ایک دوسرے سے الگ ہے۔‘

’شبہاز شریف اندر کھاتے کہتے ہیں، ای وی ایم قبول ہے، بس مجھے این آر دے دو۔‘

ان کے مطابق ’قومی حکومت کی بات کھلم کھلا این آر او کی خواہش تھی۔‘