کویت ایئر ویز نے عراق کےلیے پروازیں دوبارہ شروع کردیں
بغداد ایئرپورٹ پر راکٹ حملے کے بعد سے پروازیں معطل تھیں (فائل فوٹو اے ایف پی)
کویت ایئر ویز نے سنیچر سے عراق کے لیے کمرشل پروازیں دوبارہ شروع کی ہیں۔
سرکاری خبر رساں ایجنسی کونا کے مطابق کویت ایر ویز عراقی شہر نجف کے لیے پروازیں چلا رہی ہے۔
یاد رہے کہ کویت نے 28 جنوری کو بغداد کے بین الاقوامی ایئرپورٹ پر راکٹ حملے کے بعد سیکیورٹی خدشات کے پیش نظرعراق کے لیے پروازیں ایک ہفتے کے لیے معطل کرنے کا اعلان کیا تھا۔
کویت کی قومی فضائی کمپنی کویت ایئرویز نے ایک بیان میں کہا تھا کہ’ عراق کے لیے پروازیں کویت کی سول ایوی ایشن اتھارٹی کی ہدایات پر ’موجودہ صورتحال‘ کی وجہ سےعارضی طور پر معطل کی گئی ہیں‘۔
یاد رہے کہ عراق کے فوجی حکام نے بتایا تھا کہ بغداد انٹرنیشنل ایئرپورٹ کی تنصیبات پر چھ راکٹ گرے جس سے وہاں کھڑے دو کمرشل طیاروں کو نقصان پہنچا تاہم کوئی ہلاکت نہیں ہوئی۔
داغے گئے راکٹ ویٹنگ ایریا میں کھڑے قومی ائیر لائن عراقی ایر ویز کے طیاروں پر لگے تھے۔
