وزیراعظم شہباز شریف سے سعودی ’روٹ ٹو مکہ‘ پروجیکٹ ٹیم کی ملاقات

پاکستان کے وزیراعظم شہباز شریف سے سعودی عرب کے سفیر نواف بن سعید المالکی کی قیادت میں ’روٹ ٹو مکہ‘ پروجیکٹ ٹیم نے ملاقات کی۔

وزیراعظم ہاؤس کی پریس ریلیز کے مطابق جمعرات کو اسلام آباد میں سعودی وفد کا خیرمقدم کرتے ہوئے وزیراعظم نے اس بات کا اعادہ کیا کہ پاکستان اور سعودی عرب کے تاریخی برادرانہ تعلقات ہیں۔

اس وفد میں سعودی عرب کے جنرل ڈائریکٹوریٹ آف پاسپورٹ کے منصور شاہد ایس الطائیبی بھی موجود تھے۔

اس موقعے پر وزیراعظم شہباز شریف نے کہا کہ ’علاقائی اور بین الاقوامی سطح پر باہمی دلچسپی کے تمام امور پر دونوں ممالک کا موقف مشترک ہے۔دونوں ممالک وقت کے نشیب و فراز میں ایک دوسرے کے ساتھ کھڑے ہیں۔‘

 وزیراعظم نے روٹ ٹو مکہ منصوبے پر سعودی قیادت کا شکریہ ادا کیا  اور کہا کہ ’اس اقدام کے تحت ہزاروں پاکستانی عازمین حج کو سہولتیں فراہم کی جائیں گی۔‘

انہوں نے کہا کہ’روٹ ٹو مکہ‘ اقدام مستقبل میں پاکستان کے دیگر شہروں تک پھیلایا جائے گا۔‘

 سعودی سفیر  نواف المالکی نے دونوں ممالک کے درمیان تجارت، ترقی اور سرمایہ کاری کے شعبوں میں دوطرفہ تعاون کو مزید مضبوط بنانے کی خواہش کا اظہار کیا۔

انہوں نے کہا کہ ’روٹ ٹو مکہ‘ اقدام کا مقصد سعودی امیگریشن اور کسٹم سے متعلق رسمی کارروائیوں کو حج کے لیے اسلام آباد انٹرنیشنل ایئرپورٹ پر روانگی سے قبل مکمل کرنا ہے۔‘

سعودی سفیر نے مزید کہا ’سعودی ٹیم ایسے عازمین کی مملکت روانگی سے قبل ان کی سہولت کے لیے پاکستان میں موجود ہے۔‘ 

سعودی سفیر نے پاکستان کے وزیر خارجہ بلاول بھٹو زرداری سے بھی ملاقات کی ہے۔

بلاول بھٹو زرداری نے ٹویٹ کرتے ہوئے لکھا کہ ’سعودی عرب کے سفیر نواف بن سعید المالکی سے ملاقات کر کے خوشی ہوئی۔‘

ان کا کہنا تھا کہ باہمی دلچسپی کے وسیع معاملات پر گفتگو کی اور خیالات کا تبادلہ ہوا۔ ’دوطرفہ تعلقات خاص طور پر معاشی اور تجارتی و سرمایہ کاری کے شعبے میں مزید بڑھانے پر اتفاق کیا گیا۔‘