Sorry, you need to enable JavaScript to visit this website.

آئی سی سی کی پلیئنگ کنڈیشنز میں تبدیلیاں، کون سے نئے قوانین متعارف؟

آئی سی سی کے نئے قوانین یکم اکتوبر سے لاگو ہوں گے (فائل فوٹو: اے ایف پی)
انٹرنیشنل کرکٹ کونسل (آئی سی سی) نے بین الاقوامی کرکٹ کی پلیئنگ کنڈیشنز یعنی کھیل کے ضوابط میں تبدیلیاں کرتے ہوئے سات نئے قوانین متعارف کروائے ہیں۔
منگل کے روز آئی سی سی نے اپنی ویب سائٹ پر نئے اور تبدیل شدہ قوانین کی فہرست جاری کی ہے جو یکم اکتوبر سے انٹرنیشنل کرکٹ میں نافذالعمل ہوں گے۔
آئی سی سی کی پلیئنگ کنڈیشنز میں تبدیلیوں کی تفصیل کچھ یوں ہے۔
آئی سی سی کے نئے قانون کے تحت اب کیچ آؤٹ ہونے کے بعد نان سٹرائیکر کھلاڑی یعنی بولر کی سائیڈ پر کھڑا ہوا بیٹر کراسنگ نہیں کر سکے گا۔
آؤٹ بالخصوص کیچ آؤٹ ہونے کے بعد نیا کھلاڑی ہی آؤٹ ہونے والے کھلاڑی کی جگہ لے گا اور نان سٹرائیکر کراس کر کے نہیں کھیل پائے گا۔
کورونا وائرس کی وبا کے دوران آئی سی سی نے بولرز اور فیلڈرز کو تھوک لگا کر گیند چمکانے سے روک دیا تھا تاہم یہ پابندی برقرار رکھتے ہوئے اب کوئی بھی بولر یا فیلڈر گیند پر تھوک نہیں لگا سکے گا۔
آئی سی سی نے نئے آنے والے بیٹر کے آنے کا وقت تین منٹ سے کم کر کے دو منٹ کر دیا ہے، لہٰذا اب ٹیسٹ اور ون ڈے فارمیٹ میں آؤٹ ہونے والے کھلاڑی کی جگہ نئے کھلاڑی کو کریز پر دو منٹ کے دورانیے میں پہنچنا ہوگا، تاہم ٹی20 میں یہ دورانیہ 90 سیکنڈز کا ہوگا۔ 
اگر نیا بیٹر مقررہ وقت سے لیٹ ہوگا تو فیلڈنگ کرنے والے ٹیم کا کپتان اسے ’ٹائم آؤٹ‘ قانون کے تحت آؤٹ کرنے کا مجاز ہوگا۔
آئی سی سی کے نئے قانون کے تحت اب کسی بھی بیٹر کے لیے ضروری ہے کہ وہ شاٹ کھیلتے وقت پچ پر ہی رہے اور اگر بولر کی گیند پچ سے باہر گرتی ہے تو بیٹر کے بلے یا جسم کا کچھ حصہ پچ پرہونا لازم ہوگا۔
اگر بیٹر پچ کے باہر جا کر شاٹ کھیلے گا تو اسے ڈیڈ بال قرار دیا جائے گا اور پِچ سے باہر گرنے والی گیند کو نو بال قرار دیا جائے گا۔
نئے قانون کے تحت بولر کی جانب سے گیند کرواتے وقت فیلڈر اگر کوئی بھی غیر ضروری نقل و حرکت کرتا ہے تو امپائر بیٹنگ ٹیم کو 5 رنز کی پینلٹی دے گا تاہم اس گیند کو ڈیڈ بال قرار دیا جائے گا۔
بولر کی جانب سے نان سٹرائیکر یعنی بولنگ سائیڈ پر کھڑے ہوئے بیٹر کو رن آؤٹ کیا جانا اب باقاعدہ رن آؤٹ مانا جائے گا۔ اس سے قبل یہ قانون ’منکڈ‘ کہلاتا تھا تاہم آئی سی سی نے اسے تبدیل کر کے عام رن آؤٹ کی اصطلاح میں شامل کر دیا ہے۔

 نئے قوانین کے تحت بولر کی سائیڈ پر کھڑا بیٹر کراسنگ نہیں کر پائے گا (فائل فوٹو: اے ایف پی)

آئی سی سی کے نئے ضوابط کے مطابق بولر اب گیند کروانے سے پہلے کریز سے نکلنے والے بیٹر کی جانب اگر گیند پھینکے گا تو اسے ڈیڈ بال کہا جائے گا۔
اس کے علاوہ آئی سی سی کے مطابق ٹی20 کرکٹ میں سلو اوور ریٹ پر دائرے سے باہر فیلڈرز کی تعداد کم کرنے کے قانون کو آئی سی سی کرکٹ ورلڈ کپ سپر لیگ 2023 کے مکمل ہونے کے بعد ون ڈے کرکٹ میں بھی نافذ کیا جائے گا۔
خیال رہے کہ یہ قانون ٹی20 فارمیٹ میں پہلے سے ہی نافذ العمل ہے۔

شیئر: