بیرونِ ملک نوکریوں کا جھانسہ، انڈیا میں لوگوں کو لُوٹنے والا گروہ گرفتار

انڈین دارالحکومت نئی دہلی میں پولیس نے سینکڑوں لوگوں افراد کو بیرون ملک نوکریوں کا جھانسہ دے کر لاکھوں روپے لوٹنے کے الزام میں تین افراد کو گرفتار کرلیا ہے۔

’ٹائمز آف انڈیا‘ کے مطابق پولیس کا کہنا ہے کہ سہیل نجم، افروز عالم اور پرویز عالم کو 100 سے زائد افراد کو ترکی اور ایتھوپیا میں نوکریاں دینے کا وعدہ کیا۔

پولیس کا کہنا ہے کہ گرفتار ہونے والے افراد نے ’اے آر انٹرپرائزز‘ نامی کمپنی بنائی ہوئی تھی اور ان کی جانب سے سوشل میڈیا اور جعلی ویب سائٹس پر بیرون ملک نوکریوں کے اشتہارات دیے جاتے تھے جن کا دراصل کوئی وجود ہی نہیں تھا۔

ڈپٹی کمشنر آف پولیس راجیش دیو کا کہنا ہے کہ ملزمان نے پولیس کو بتایا کہ انہوں نے مختلف ویب سائٹوں پر ترکی اور ایتھوپیا میں نوکریوں کی جعلی تفصیلات چسپاں کی ہوئیں تھیں اور انہوں نے نوکریوں کے خواہشمند افراد کو ملازمتوں کے لیٹر بھی واٹس ایپ کے ذریعے بھیجے۔

پولیس کا مزید کہنا تھا کہ ملزمان نے نوکری کے خواہشمند افراد کے پاسپورٹ بھی اپنے پاس رکھے ہوئے تھے۔ ڈپٹی کمشنر آف پولیس کا مزید کہنا تھا کہ ملزمان کے قبضے سے پولیس نے چھ موبائل فونز، دو لیپ ٹاپ، 68 انڈین پاسپورٹ، چینی کمپنیوں کے جعلی ملازمتوں کے لیٹر اور ترکی اور ایتھوپیا کے جعلی ائیر ٹکٹ بھی برآمد ہوئے ہیں۔

لوگوں کو جعلی نوکریوں کا جھانسہ دینے کا معاملہ اس وقت منظر عام پر آیا جب دلاور سنگھ نامی ایک شخص پولیس کے پاس شکایت درج کروانے کے لیے پہنچا اور کہا کہ اس سے ’اے آر انٹرپرائزز‘ نے ایک لاکھ روپے لیے ہیں۔

ڈپٹی کمشنر آف پولیس کے مطابق ملزمان کے بینک اکاؤنٹ بھی مجمند کردیے گئے ہیں جن میں 50 سے 60 لاکھ روپے تھے۔