روس اور یوکرین کے درمیان ثالثی سے 168 قیدیوں کی رہائی ممکن ہوئی: امارات
جمعرات 14 اگست 2025 21:17
بیان میں کہا گیا ہے کہ متحدہ عرب امارات پرامن تصفیے کے حصول اور تنازع کے انسانی اثرات کو کم کرنے کے لیے اقدامات کو آگے بڑھانے کی کوششیں جاری رکھے گا۔ (فوٹو: اے ایف پی)
متحدہ عرب امارات نے جمعرات کے روز اعلان کیا کہ روس اور یوکرین کے درمیان اس کی ثالثی کے نتیجے میں قیدیوں کا تبادلہ ہوا ہے، جس میں دونوں جانب سے 84 قیدی شامل ہیں۔
سرکاری خبر رساں ادارے ’وام‘ کے مطابق اس تبادلے کے بعد جنگ کے دوران اب تک قیدیوں کے تبادلے میں رہا ہونے والوں کی کل تعداد 4,349 ہو گئی ہے۔
وزارت خارجہ نے قیدیوں کے تبادلے میں تعاون پر ماسکو اور کیف دونوں کا شکریہ ادا کیا اور کہا کہ یہ اقدام متحدہ عرب امارات کی بحران کے حل کی کوششوں کی حمایت کے عزم کا اعتراف ہے۔
یہ جنگ کے آغاز کے بعد امارات کی 16ویں کامیاب ثالثی ہے۔
وزارت نے اعادہ کیا کہ متحدہ عرب امارات پرامن تصفیے کے حصول اور تنازع کے انسانی اثرات کو کم کرنے کے لیے اقدامات کو آگے بڑھانے کی کوششیں جاری رکھے گا۔
