امریکہ کی پوپ سپرسٹار ٹیلر سوئفٹ اور امریکی فٹ بالر ٹریوس کیلس نے منگنی کرنے کا اعلان کیا ہے۔
فرانسیسی خبر رساں ایجنسی اے ایف پی کے مطابق یہ دنیا کے مشہور ترین جوڑوں میں سے ایک کی ہائی پروفائل شادی کا پہلا مرحلہ ہے۔
دونوں نے منگل کو انسٹاگرام پیجز پر ایک مشترکہ پوسٹ میں تصاویر شائع کیں جن میں سے ایک تصویر میں کیلس پھولوں کے باغ میں گھٹنے پر بیٹھ کر سوئفٹ کو شادی کی پیش پیش کر رہے ہیں تو دوسری تصویر میں پوپ سنگر نے ہیرے کی ایک بڑی انگوٹھی پہن رکھی ہے۔
معروف جوڑے نے تصویروں کے ساتھ مزاحیہ کیپشن میں لکھا کہ ’آپ کے انگریزی کے ٹیچر اور جم ٹیچر کی شادی ہو رہی ہے؟‘
واضح رہے کہ ٹیلر سوئفٹ اور ٹریوس کیلس دونوں کی عمر 35 برس ہے۔ اِن کی دوستی کی خبریں پہلی مرتبہ 2023 میں سامنے آئیں اور دونوں اکثر مختلف کنسرٹس یا کنساس سٹی چیفس (ٹریوس کیلس کی فٹ بال ٹیم) کے میچ کے دوران دیکھے گئے۔
گذشتہ برس ٹیلر سوئفٹ نے اپنے ایراس ٹور کے دوران ٹکٹوں کی فروخت کی مد میں دو ارب ڈالر سے زائد رقم کمائی جس نے تمام ریکارڈ توڑ دیے اور انہیں دنیا کا سب سے بڑا میوزک سٹار بنا دیا۔
اُنہیں دسمبر 2024 میں اختتام پذیر ہونے والے اس ٹُور کے دوران مجموعی طور پر 2 ارب 7 کروڑ 76 لاکھ 18 ہزار 725 ڈالر کی آمدنی ہوئی۔
ٹیلر سوئفٹ کے شوز کی ٹکٹیں مہنگی ہونے کے باوجود ہاتھوں ہاتھ فروخت ہوئیں اور لاکھوں شائقین اُن کی جانب متوجہ ہوئے۔
سوئفٹیز۔۔۔ اُن کے فینز جو اس نام سے پہچانے جاتے ہیں، ٹیلر سوئفٹ کی نئی البم کا انتظار کر رہے ہیں جو تین اکتوبر 2025 کو ریلیز ہو گی۔
