ریاض میں بریسٹ کینسر سے آگاہی کے لیے خصوصی واک کا اہتمام

سپورٹس بلیوارڈ نے بریسٹ کینسرآگاہی کے عالمی ماہ کے موقع پر ریاض کے پرومینیڈ خصوصی واک کا اہتمام کیا جس میں بڑی تعداد میں مختلف شعبہ ہائے زندگی سے تعلق رکھنے والے افراد نے شرکت کی۔

سعودی خبررساں ادارے ’ایس پی اے‘ کے مطابق اس مہم کا مقصد بریسٹ کینسر سے بچاو کےلیے ابتدائی تشخیص کی اہمیت کو اجاگر کرنا معاشرے میں صحت مندانہ طرز زندگی کو اپنانے کی ترغیب دینا ہے۔

واک کے آغاز سے قبل شرکا میں مخصوص ٹریک سوٹ تقسیم کیے گئے۔ واک کے دو سیشنز تھے جن میں فیملیز اورخواتین شامل ہوئیں۔

فیملیز کے لیے واک کا آغاز شام پانچ بجے ہوا جبکہ صرف خواتین کی واک کا پروگرام  چھ بجے شروع ہو جو ساڑھے سات بجے  اختتام کو پہنچا۔  

واضح رہے سپورٹس بلیوارڈ ’سپورٹس ٹریک‘ ریاض شہر کا اہم منصوبہ ہے جس کے تحت سارے سال کمیونٹی سپورٹس کے حوالے سے مختلف صحتمدانہ سرگرمیاں منعقد کی جاتی ہیں۔

علاوہ ازیں شرکا کا کہنا تھا ’ہم اس آگاہی واک میں شریک ہیں جو خواتین کی صحت کے حوالے سے شروع کی گئی ہے۔‘

واک میں شریک ایک خاتون کا کہنا تھا ’مملکت کی جانب سے صحت مندانہ معاشرے کے لیے بہت کچھ کیا جارہا ہے جو خوش آئند ہے جس میں سپورٹس سرگرمیاں شامل ہیں۔ علاوہ ازیں بریسٹ کینسر کے حوالے سے آگاہی واک بہت اہم ہے۔‘

فلپائن سے تعلق رکھنے والی ایک خاتون کا کہنا تھا’ یہ ہمارے لیے بھی اعزاز کی بات ہے کہ فلپائنی کمیونٹی بھی اس ایونٹ میں شامل ہے، صحت کو برقرار رکھنے کےلیے سپورٹس سرگرمیاں اہم ہیں۔ ایونٹ بہت اچھی طرح منظم کیا گیا ہے جبکہ لوگ بھی بہت اچھے اور تعاون کرنے والے ہیں۔‘