’ ’السعودیہ‘ کی پروازوں میں مفت ہائی سپیڈ انٹرنیٹ سروس فراہم کی جائے گی‘

سعودی عرب کی قومی فضائی کمپنی ’السعودیہ‘ کی جانب سے پروازوں میں ہائی اسپیڈ انٹرنیٹ سروس فراہم کرنے کی تیاریاں آخری مراحل میں ہیں۔

اخبار 24 کے مطابق وزیر ٹرانسپورٹ اینڈ لاجسٹک سروسز انجینئرصالح الجاسر نے دوران پرواز نیٹ سروس کا تجربہ کرتے ہوئے وزیر ٹیلی کمیونیکیشن انجینئرعبداللہ السواحہ سے وڈیو لنک کے ذریعے گفتگو بھی کی۔

دوران پرواز وزیر ٹرانسپورٹ کے ہمراہ السعودیہ ایئر کے ڈائریکٹر جنرل انجینئرابراہیم العمر بھی موجود تھے۔

اس موقع پر ہائی سپیڈ انٹرنیٹ سروس کا تجربہ السعودیہ کی پرواز ایس وی 1044 پر کرتے ہوئے انہوں نے سعودی لیگ کا براہ راست میچ بھی دیکھا علاوہ ازیں سعودی ٹی وی الاخباریہ کو وڈیو لنک کے ذریعے انٹرویو بھی دیا۔

ایئرلائن کے ڈائریکٹر جنرل انجینئرابراہیم العمر کا کہنا تھا ’جلد ہائی سپیڈ انٹرنیٹ کی سہولت ایئرلائن کی تمام پروازوں کے مسافروں کے لیے مفت میں فراہم کی جائے گی۔ السعودیہ اپنے مہمانوں کو ہر ممکن سہولت فراہم کرنے کےلیے سنجیدگی سے کوشاں ہے۔

انہوں نے مزید بتایا’ ابتدائی طورپر فضائی کمپنی کے 20 طیاروں میں تجرباتی طورپر نیٹ کی سہولت فراہم کی گئی ہے جبکہ جلد تمام پروازوں کے لیے یہ سہولت فراہم کردی جائے گی قانونی وتکنیکی مراحل مکمل کیے جارہے ہیں۔‘

واضح رہے السعودیہ کی جانب سے پروازوں میں ابتدائی طورپر 300 میگا بائیٹ فی سیکنڈ کی رفتار سے انٹرنیٹ سروس فراہم کی جارہی ہے جسے مستقبل میں 800 میگا بائیٹ تک بڑھا دیا جائے گا۔ مسافر براہ راست و کسی دشواری کے بغیر اپنے پسندیدہ ٹی وی شوز دیکھ سکیں گے علاوہ ازیں وڈیو لنک پر بھی بات کی جاسکے گی۔