پانچویں حج کانفرنس و نمائش کا آغاز، 60 فیصد سے زیادہ حج معاہدے مکمل: الربیعہ

جدہ میں اتوار کو ’مکہ سے دنیا تک‘ کے سلوگن کے تحت چار روزہ حج کانفرنس و نمائش کے پانچویں ایڈیشن کا آغاز ہوگیا جو 12 نومبر تک جاری رہے گی۔ 

سعودی وزیر حج ڈاکٹر توفیق الربیعہ نے کہا ہے کہ’ 60 فیصد سے زیادہ حج معاہدوں کو حتمی شکل دے دی، باقی معاہدے حج سیزن سے چار ماہ قبل مکمل کرلیے جائیں گے۔‘

انہوں نے بتایا ’مقدس مقامات پر پچاس فیصد تیاریاں مکمل ہیں اور باقی ذی القعدہ کے آغاز تک مکمل ہونے کی امید ہے۔ رہائش اور ہوٹلوں کا 70 فیصد سے زیادہ کام مکمل ہوچکا ہے۔‘

ڈاکٹر توفیق الربیعہ کا کہنا تھا کہ’ گزشتہ حج سیزن پچھلے پچاس برسوں میں بہترین تھا۔‘

 انہوں نے کہا’ نسک ایپلی کیشن اے آئی فیچر کے ذریعے اپنی خدمات کو ترقی کے نئے مرحلے تک لے جائے گی، جس کا مقصد زائرین کےتجربے کو بہت بنانا اور فوری خدمات کی فراہمی ہے۔‘

انہوں نے بتایا’ نسک ایپلی کیشن کے صارفین کی تعداد 40 ملین سے تجاوز کر کرگئی ہے۔‘

یاد رہے وزارتِ حج وعمرہ اور کنگ عبدالعزیز فاونڈیشن فار ریسرچ اینڈ آرکائیوز نے سنیچر کو ایک پریس بریفنگ میں پانچویں حج کانفرنس و نمائش کی تفصیلات کا اعلان کیا  تھا۔

 وزارت حج  کے سرکاری ترجمان ڈاکٹرغسان النویمی کا کہنا تھا ’کانفرنس ڈیڑھ لاکھ سے زیادہ وزیٹرز کو متوجہ کرے گی جو گزشتہ برس کے ایک لاکھ 20 ہزار سے زیادہ ہے۔‘

حج کانفرنس و نمائش 60 ہزار مربع میٹر کے رقبے پھیلی ہوئی ہے جو حج سے متعلق 18 شعبوں کا احاطہ کرے گی۔

کانفرنس کے شرکا، 225 سپیکرز، 270 نمائش کنندگان کے ساتھ 143 خصوصی سیشنز سے فائدہ اٹھا سکیں گے۔

کانفرنس کی خاص بات ’انوویشن زون‘ ہے جو مصنوعی ذہانت، پائیدار انجینیئرنگ اور کراوڈ منیجمنٹ ٹیکنالوجی کے ذریعے مستقبل کی خدمات کو اجاگر کرے گا۔

 کانفرنس کا انعقاد مملکت کے وژن 2030 کے اہداف کو مدنظر رکھتے ہوئے کیا گیا ہے جس کا مقصد عازمین حج و عمرہ زائرین کو اس سفر مقدس میں ہر ممکن سہولتوں کی فراہمی کو یقینی بنانا ہے۔

کانفرنس و نمائش ایک ایسا بین الاقوامی پلیٹ فارم ہے جو حج و عمرہ شعبے کے ماہرین اورمختلف ممالک کی تنظیموں کے نمائندوں کے ایک منتخب گروپ کو ایک جگہ جمع کرنے کا موقع فراہم کرتا ہے۔ عازمین حج کی سہولت کے لیے جدید ترین حل اور اختراعات کا جائزہ لیتے ہوئے سرکاری، نجی اور غیرمنافع بخش شعبوں کے مابین موثر تعاون و شراکت داری کو قائم کیا جائے۔

 حج کانفرنس و نمائش کے گزشتہ ایڈیشن میں 220 کمپنیوں اور اداروں نے شرکت کی تھی جبکہ حج سیزن کے حوالے سے متعدد معاہدوں پر بھی دستخط کیے گئے تھے۔