خسارے میں چلنے والے بجلی کے فیڈرز کو شمسی توانائی پر منتقل کرنے کا فیصلہ

پاکستان کے وزیراعظم شہباز شریف کی زیرِ صدارت ملک کے دور دراز علاقوں میں بجلی کی بلاتعطل فراہمی کیلئے سولرائزیشن کے حوالے سے اعلٰی سطح کا اجلاس جمعے کو اسلام آباد میں منعقد ہوا۔
وزیراعظم آفس کے مطابق ’شہباز شریف نے پیسکو اور کیسکو کے خسارے میں چلنے والے فیڈرز کو شمسی توانائی پر منتقلی کے منصوبے کی منظوری دے دی۔‘
وزیراعظم کو بریفنگ میں بتایا گیا کہ ’ایسے فیڈرز کی شمسی توانائی پر منتقلی سے مقامی آبادی کے لیے ماحول دوست، کم لاگت اور پائیدار مایئکرو گرڈ بن جائے گا۔‘ 

’مقامی آبادی، صوبائی اور وفاقی حکومتیں اس منصوبے میں شراکت دار ہوں گی، منصوبے سے کم لاگت بجلی پیدا ہوگی اور بجلی کی تقسیم کار کمپنیوں کے خسارے میں بھی نمایاں کمی ہوگی۔‘ 
وزیراعظم شہباز شریف نے منصوبے کی اصولی منظوری دیتے ہوئے کہا کہ ’زیادہ خسارہ کرنے والے بجلی کے فیڈرز، کمیونٹی اور صوبائی حکومتوں کے تعاون سے شمسی توانائی پر منتقل کیے جائیں۔‘
انہوں نے کہا کہ ’اس اقدام سے خسارے میں چلنے والے فیڈرز کے نقصانات میں کمی ہوگی  اور ان علاقوں میں بجلی مسلسل فراہم ہو گی۔‘
وزیراعظم شہباز شریف نے ہدایت کی کہ ’پیسکو اور قیسکو کے نقصانات میں چلنے والے فیڈرز میں فی الفور پائلٹ پراجیکٹس کا اجرا کیا جائے۔‘
’پائلٹ پراجیکٹس کو کامیاب بنانے کے لیے علاقے کے منتخب نمائندوں سے مشاورت اور کمیونٹی کی شرکت یقینی بنائی جائے۔‘
اس حوالے سے اُن کا مزید کہنا تھا کہ ’خیبر پختونخوا اور بلوچستان میں پائلٹ پراجیکٹس پر فوری کام شروع کیا جائے۔‘
اجلاس میں نائب وزیراعظم و وزیر خارجہ اسحاق ڈار، وزیر بجلی سردار اویس احمد خان لغاری، وزیر پیٹرولیم علی پرویز ملک، وزیر مملکت برائے خزانہ بلال اظہر کیانی، خیبر پختونخوا اور بلوچستان کے چیف سیکریٹریز کے ساتھ ساتھ اعلٰی سرکاری حکام شریک ہوئے۔