سعودی ولی عہد نے برطانوی شہزادے ولیم کو تاریخی مقام الطریف کا دورہ کرایا

سعودی ولی عہد شہزادہ محمد بن سلمان نے پیر کو الدرعیہ میں برطانوی شہزادے ولیم کا خیرمقدم کیا۔ 

برطانوی شہزادے ولیم کو یونیسکو کے عالمی ثقافتی ورثے کی فہرست میں شامل تاریخی مقام الطریف کا دورہ کرایا۔

الطریف، درعیہ ڈسٹرکٹ کے مرکز میں ریاض کے شمال مغرب میں واقع ہے اور سعودی عرب کے اہم تاریخی مقامات میں سے ایک ہے۔

یاد رہے الطریف میں سعودی ریاست کی بنیاد رکھی گئی تھی اور یہ پہلی سعودی ریاست کے بانی امام محمد بن سعود کے زمانے میں ریاست کا دارالحکومت تھا۔

ایس پی اے کے مطابق اس دورے میں شہزادہ ولیم نے تاریخی الطریف ڈسٹرکٹ میں نجدی طرز تعمیر کی نمائش، پہلی سعودی ریاست کے اماموں اور شہزادوں کے محلات دیکھے۔

امام قصر سلوی کے سامنے ایک یادگاری تصویر بھی بنوائی، جو پہلی سعودی ریاست کے دوران حکومت کے مرکز کے طور پر کام کرنے والے تاریخی محلات میں سے ایک ہے۔

 اس دورے میں الدرعیہ ماسڑ پلان کے بارے میں ایک پریزنٹیشن شامل تھی۔

 قبل ازیں برطانوی شہزادہ ولیم پیر کو سعودی عرب کے اپنے پہلے سرکاری دورے پر ریاض پہنچے تو ریاض کے کنگ خالد انٹرنیشنل ایئرپورٹ پر ریاض ریجن کے نائب گورنر شہزادہ محمد بن عبدالرحمن بن عبدالعزیز نے ان کا خیرمقدم کیا۔

عرب نیوز کے مطابق شہزادہ ولیم کی ریاض آمد سعودی اور برطانوی بادشاہتوں کے درمیان اس خصوصی رشتے کی پھر توثیق ہوئی ہے جو کہ ان کی دادی ملکہ الزبتھ دوم کی حکمرانی کے ابتدائی ایام میں قائم ہوا تھا اور اب تک مسلسل فروغ پا رہا ہے۔

شہزادہ ولیم اس سے قبل بھی اس خطے کا دورہ کر چکے ہیں، ان کا پہلا دورہ ذاتی نوعیت کا تھا تاہم انہوں نے جون 2018 میں فلسطین اور اسرائیل کے دورے کیے تھے اور اسرائیلی وریراعظم بنجمن نیتن یاہو اور فلسطینی صدر محمود عباس کے ساتھ ملاقاتیں کی تھیں۔