پاکستان میں مختلف علاقوں میں بارشوں کا نیا سلسلہ کب تک جاری رہے گا؟

محکمہ موسمیات نے خیبرپختونخوا، وفاقی دارالحکومت اور پنجاب کے بعض علاقوں میں جاری بارش کا سلسلہ شدید ہونے کا امکان ظاہر کرتے ہوئے ژالہ باری کی پیش گوئی بھی کی ہے۔

پیر کی صبح محکمہ موسمیات کی جانب سے جاری کیے گئے بیان میں بتایا گیا ہے کہ جڑواں شہروں اسلام آباد اور راولپنڈی کے علاوہ مری، گلیات، اٹک، تلہ گنگ، چکوال، جہلم، منگلا، گوجر خان میں بھی بارش کا سلسلہ جاری ہے۔

اسی طرح کشمیر کے علاقوں مظفر آباد، راولا کوٹ، پتن، چلاس گوپس کے علاوہ خیبر پختونخوا کے شہروں پشاور، صوابی، مردان، ایبٹ آباد، بالاکوٹ، ہری پور، مانسہرہ سمیت دیگر علاقوں میں گرج چمک کے ساتھ تیز بارش ہو رہی ہے۔

محکمہ موسمیات کی جانب یہ بھی بتایا گیا ہے کہ چند مقامات پر ژالہ باری کے بھی امکانات موجود ہیں جبکہ آسمانی بجلی گرنے کے واقعات بھی ہو سکتے ہیں۔

بیان میں عوامی حلقوں کو محتاط رہنے اور احتیاطی تدابیر اختیار کرنے کا مشورہ دیا گیا ہے جبکہ یہ بھی کہا گیا ہے کہ وہ خود کو موسم کی صورت حال سے باخبر رکھیں۔

بارش کے باعث شہری علاقوں میں اربن فلڈنگ کے خدشات بھی ظاہر کیے جا رہے ہیں۔

محکمہ موسمیات کی جانب سے اتوار کو بتایا گیا تھا کہ بلوچستان کے ضلاع ژوب، موسیٰ خیال، سبی، کوہلو، بارکھان، نصیر آباد اور ملحقہ علاقے فلیش فلڈ سے دوچار ہو سکتے ہیں۔

جبکہ خیبر پختونخوا کے حوالے سے بتایا گیا تھا کہ وہاں بھی شدید بارش ہو سکتی ہے اور تیز ہوائیں چلنے کا امکان ہے۔

یہ خدشہ بھی ظاہر کیا گیا تھا کہ شدید بارش اور تیز ہوائیں کمزور انفراسٹرکچر کے لیے خطرناک ہو سکتی ہیں اور لوگوں کو ایسے مقامات سے دور رہنے کی تلقین کی گئی تھی۔

لاہور سمیت پنجاب کے دوسرے شہروں میں اتوار کو ہونے والی بارش کے بعد موسم خوشگوار ہوا جبکہ آج بھی وہاں بارش ہونے کا امکان ظاہر کیا گیا ہے۔

صوبہ سندھ کے حوالے سے بتایا گیا ہے کہ وہاں کے بعض مقامات پر بھی مطلع جزوی طور پر ابرآلود رہ سکتا ہے جبکہ تیز ہوائیں چلنے کی پیش گوئی بھی کی گئی۔