سعودی وزیر داخلہ سے محسن نقوی کی ملاقات، سکیورٹی شعبے میں مفاہمتی یادداشت پر دستخط

سعودی وزیر داخلہ شہزادہ عبدالعزیز بن سعود بن نایف سے بدھ کو ریاض میں وزارت کے ہیڈ کوارٹر میں پاکستانی ہم منصب محسن نقوی نے ملاقات کی ہے۔

ایس پی اے کے مطابق ملاقات میں سعودی عرب اور پاکستان کے درمیان تعلقات کا جائزہ اور مشترکہ دلچسپی کے امور پر تبادلہ خیال کیا گیا۔

دونوں ملکوں کے وزارت داخلہ کے درمیان تعاون اور سکیورٹی کوآرڈینیش بڑھانے کے طریقوں پر بھی بات کی گئی۔

بعد ازاں سعودی وزیر داخلہ شہزادہ عبدالعزیز بن سعود بن نایف اور پاکستان کے وزیر داخلہ محسن نقوی نے دونوں ملکوں کی وزارت داخلہ کے درمیان سائنسی، تربیتی اور تحقیقی تعاون کو فروغ دینے سے متعلق ایک مفاہمتی یادداشت پر دستخط کیے۔ اس معاہدے کا مقصد دونوں وزارتوں کے درمیان باہمی دلچسپی کے شعبوں میں مہارت کے تبادلے کو فروغ دینا ہے۔

شہزادہ عبدالعزیز بن سعود بن نایف نے ایکس پر پوسٹ میں لکھا ’قیادت کی ہدایات پر عمل کرتے ہوئے آج پاکستان کے وزیر داخلہ محسن نقوی سے ملاقات کی۔ ہم نے دونوں ملکوں کے درمیان سکیورٹی تعاون مضبوط بنانے کے مشترکہ عزم کا اعادہ کیا۔ سکیورٹی فیلڈ میں ایک مفاہمتی یادداشت پر دستخط کیے جو سعودی عرب اور پاکستان کے درمیان گہرے تعلقات اور مضبوط سٹریٹجک شراکت داری کی عکاسی کرتا ہے۔‘

اس موقع پر نائب وزیر داخلہ شہزادہ ڈاکٹر عبدالعزیز بن محمد بن عیاف اور وزارت داخلہ کے دیگر اعلی عہدیدار اور مملکت میں پاکستان کے سفیر احمد فاروق موجود تھے۔

علاوہ ازیں پاکستان کے  وزیر داخلہ محسن نقوی نے ریاض میں وزارت داخلہ کے یونیفائیڈ آپریشنز سینٹر 911 کا بھی دورہ کیا۔